तरुणाईला लागले आमदार, खासदारकीचे डोहाळे

नामपूर, जि. नाशिक : तरुणाईला व्यक्त होण्याचे प्रभावी माध्यम म्हणून सोशल मीडियाकडे पाहिले जाते. इंटरनेटचे दर स्वस्त केल्यामुळे फेसबुक, व्हॉट्सॲप, ट्विटर आदी समाज माध्यमांचा बोलबाला आहे. सध्या फेसबुकवर एका लिंकद्वारे आमदार, खासदारापासून पंतप्रधान, राष्ट्रपती होण्याचे डोहाळे लागले आहेत.  ग्रामीण भागातील फेसबुकच जग सध्या मुरब्बी राजकारणाने व्यापलेले पाहायला मिळत आहे. राजकारणात नशीब आजमविण्यासाठी सध्या फेसबुक मनोरंजनाचा सुपर डोस बनलाय. फेसबुकवर सध्या तुम्ही राजकारणात कोणत्या पदावर जाल? अशी लिंक येते. त्यानंतर सर्वसामान्य माणूसही सरपंच, पंचायत समिती सदस्य, नगरसेवक, विधानसभा सभापती, पंतप्रधान, मुख्यमंत्री, राज्यमंत्री, खासदार, आमदार, महापौर, नगरसेवक अगदी सहज एका क्लिकवर होत असल्याने सध्या याचीच सोशल मीडियावर चांगलीच चर्चा रंगू लागली आहे. त्यांना जोरदार प्रतिक्रियासह अभिनंदनाचादेखील वर्षाव होत आहे. 'मला आमदार झाल्यासारखं वाटतंय’ हे लोकगीत सर्वपरिचित आहे, मात्र फेसबुकवर ‘आमदारच’ नव्हे तर अगदी सरपंच, नगरसेवकापासून ते राष्ट्रपती होण्यापर्यंत कसलेच बंधन नसल्याने जो तो मंत्री होण्याचा आस्वाद घेत आहे. फेसबुकवर विचारलेल्या ‘तुम्ही कोणत्या पदावर जाल? या प्रश्नाच्या उस्तुकतेने या मेजिक प्रोफाईलवर जावून आपली राजकीय कुवत अजमावत आहेत. फेसबुकवरील हे राजकारणाचे वारे थांबायला तयार नसल्याने अनेकांनी वेगवेगळ्या राजकीय पक्षांना टार्गेट करत यांची खाल्ली उडवायला सुरवात केली आहे. 

झुक्याने हास्याची लकेर फुलविली फेसबुकवर आपल्या राजकारणाची करकीर्द सुरू केल्यानंतर मजेशीर कमेंटही पाहायला मिळत आहेत. आम्हाला आपल्या पक्षात घ्या, आता तर नोकरी पक्की, जे शाळेत कधी मॉनिटर नाही झाले, ते सध्या राजकारणात व्यस्त, अशा एकापेक्षा एक कमेंटने साऱ्यांच्याच चेहऱ्यावर झुक्याने हास्याची लकेर फुलविली आहे.