सांगली जिल्ह्यातील ५२ प्रकल्प कोरडे

सांगली : पावसाळा सुरू होऊन दीड महिना झाला तरीही जिल्ह्यात समाधानकारक पाऊस पडलेला नाही. त्यामुळे ८४ लघुप्रकल्पांपैकी तब्बल ५२ प्रकल्प कोरडे ठणठणीत आहेत. याशिवाय जत, कवठेमहांकाळ आणि मिरज तालुक्यातील पाचही मध्यम प्रकल्पांत पाण्याचा थेंबही नाही. या पावसाळ्यात पुरेसा पाऊस न पडल्यास पुढील उन्हाळ्यामध्ये पाण्याची गंभीर परिस्थिती निर्माण होण्याबरोबर जिल्ह्याला सलग तिसऱ्या वर्षी दुष्काळाचा सामना करावा लागण्याची शक्यता आहे.

निम्मा पावसाळा संपत आला आहे. जिल्ह्याच्या पावसाच्या सरासरीपेक्षा तब्बल १६ टक्के उणे पाऊस आहे. या कमी पडलेल्या पावसामुळे जिल्ह्यातील बहुतांशी तलाव कोरडे आहेत. 

जिल्ह्यात मध्यम ८४; तर पाच मध्यम प्रकल्प आहेत. यापैकी तब्बल ५२ तलाव कोरडे आहेत. याशिवाय पाचही मध्यम प्रकल्पांत पाण्याचा थेंबही नाही. लघुप्रकल्पात फक्त १० टक्केच पाणीसाठा आहे. गतवर्षी १२ टक्के होता. या वर्षी तो दोन टक्क्यांनी कमी आहे. या तलावात सध्या एक हजार ४६८ दलघफु पाणीसाठा असून यातील काही तलवांतील पाणी हे टेंभू, ताकारी आणि म्हैसाळ पाणी योजनेतून सोडलेले आहे.

शिराळा तालुक्यात समाधानकारक पाऊस पडल्याने या तालुक्यातील मोरणा मध्यम प्रकल्पात सात टक्के पाणीसाठा आहे. जत तालुक्यातील दोड्डानाला, संख, कवठेमहांकाळमधील बसप्पावाडी, मिरजेतील सिद्धेवाडी हे पाचही मध्यम प्रकल्प कोरडे आहेत. आटपाडी तालुक्यात १३ लघुप्रकल्प आहेत. त्यापैकी तीन तलावांत पाण्याचा थेंबही नाही.

जत तालुक्यात २६ लघुप्रकल्पांपैकी निम्म्यावर म्हणजे १८ तलाव कोरडे आहेत. खोजनवाडी तलावात तीन, कोसारी १७, प्रतापूर ७, तिपेहळ्ळीत तीन टक्के पाणी आहे. 

कवठेमहांकाळ तालुक्यात १० तलाव आहेत. यातील तब्बल आठ तलाव कोरडे आहेत. म्हैसाळ योजनेचे पाणी सोडल्याने नागोंळेत ४६; तर लांडगेवाडी तलावात दोन टक्के पाणीसाठा आहे. कडेगाव तालुक्यात नऊ तलावांपैकी दोन तलाव कोरडे आहेत. तासगाव तालुक्यात सहा तलाव असून यातील पाच तलाव कोरडे आहेत. खानापूरमध्ये आठ तलावांपैकी सहा कोरडे आहेत. मिरज तालुक्यात तीनपैकी भोसे येथील तलावात पाणी नसल्याची स्थिती आहे. 

तालुकानिहाय तलावातील पाणी