बुलडाणा, वाशीम जिल्ह्यांत कडकडीत बंद

अकोला : मराठा क्रांती मोर्चाच्या वतीने आरक्षणासाठी सुरू असलेल्या आंदोलनास पाठिंबा देण्यासाठी मंगळवारी (ता. २४) वऱ्हाडात बुलडाणा, वाशीम जिल्ह्यात कडकडीत बंद पाळण्यात अाला. अकोला जिल्ह्यांत काही ठिकाणी रास्ता रोको आंदोलन करण्यात आले.

मराठा अारक्षणाच्या मुद्यावर सुरू असलेल्या आंदोलनाला पाठिंबा देण्यासाठी मंगळवारी वऱ्हाडातील विविध शहरांमध्ये बंदचे अावाहन करण्यात अाले होते. सकाळीच मराठा क्रांती मोर्चाचे कार्यकर्ते व्यावसायिक प्रतिष्ठाने बंद करण्यासाठी रस्त्यांवर उतरले. बंदचा प्रभाव बुलडाणा जिल्ह्यात अधिक होता. शेगाव, बुलडाणा, चिखली, मोताळा, खामगाव, मेहकर, लोणार, सिंदखेडराजा यासह इतर शहरांमध्ये बंद पाळण्यात अाला. संग्रामपूर तालुक्यात वरवट बकाल येथे बंद पाळून शासनाच्या विरोधात घोषणा देण्यात अाल्या. अकोला जिल्हयात बोरगाव मंजू पोलिस ठाण्याच्या हद्दीत कौलखेड जहाँगीर येथील तरुणांनी रस्त्यांवर उतरून रास्ता रोको करीत पोलिसांच्या माध्यमातून शासनाला निवेदन दिले.

वाशीममध्ये आंदोलन पेटले आरक्षणासाठी सुरू असलेल्या आंदोलनादरम्यान काकासाहेब शिंदे यांचा मृत्यू झाला. या घटनेनंतर वाशीम जिल्ह्यात सकल मराठा समाजाच्या वतीने तीव्र आंदोलन करण्यात आले.वाशीम, मालेगाव, रिसोड शहरात कडकडीत बंद पाळून मुख्यमंत्री देवेंद्र फडणवीस यांचा निषेध करण्यात आला. रिसोडमध्ये मुख्यमंत्र्यांचा प्रतीकात्मक पुतळा जाळण्यात आला.

वाशीम येथे पुसद नाका चौकात चक्काजाम आंदोलन करण्यात आले. शहरात कडकडीत बंद पाळून मुख्यमंत्री देवेंद्र फडणवीस यांचा निषेध करण्यात आला. रिसोड शहरात मोठ्या प्रमाणावर निदर्शने करण्यात आली. मालेगाव येथे चक्काजाम आंदोलन करण्यात आले. मोहजा फाट्यावर चक्काजाम आंदोलन झाले. आंदोलनामुळे वाशीम शहरातील अनेक शाळांना सुटी देण्यात आली होती. कोठेही अनुचित प्रकार घडला नव्हता.