agriculture news in marathi,american fall army warm on maize crop, buldhana, maharashtra | Agrowon

मोताळा, देऊळगावराजा तालुक्यात शंभर हेक्टरवर लष्कर अळीचा प्रादुर्भाव

टीम अॅग्रोवन
सोमवार, 22 जुलै 2019

मी या वर्षी ११ एकरांत मक्याची लागवड केली आहे. आजवर सर्वांत चांगले पीक दिसून येत आहे. मात्र, या वर्षी अळीचा प्रादुर्भाव दिसून येत आहे. अळीला नियंत्रणात आणण्यासाठी महिनाभरातच दोन वेळा फवारणी करावी लागली. इतक्या वर्षांत कधीही मक्यावर फवारणी करावी लागलेली नाही. यंदाची परिस्थिती मात्र वेगळी ठरली आहे. सध्या चांगले दिसत असलेल्या या पिकाची खूप काळजी घ्यावी लागत आहे.
- विठ्ठलराव पाटील, मका उत्पादक, कोथळी, जि. बुलडाणा

बुलडाणा : खरिपात विदर्भात मका उत्पादनात अव्वल असलेल्या बुलडाणा जिल्ह्यातील मोताळा, देऊळगावराजा या तालुक्यांतील काही गावांत १०० हेक्टरवर अमेरिकन लष्करी अळीचा प्रादुर्भाव दिसून आला आहे. या ठिकाणी कृषी अधिकारी व शास्त्रज्ञांनी तातडीने भेटी देऊन उपाययोजनांबाबत शेतकऱ्यांना मार्गदर्शन करणे सुरुरू केले आहे. 

गेल्या हंगामात आलेले या अळीचे संकट अद्याप मोठ्या प्रमाणात नसले, तरी सुरवात मात्र झाली आहे. जिल्ह्यात दोन ते तीन टक्के प्रमाणात ही अळी असावी, असा अंदाज व्यक्त केला जात आहे. बुलडाणा जिल्ह्यात मक्याचे सरासरी क्षेत्र ६१,११५ हेक्टर आहे. या वर्षी अनियमित पावसामुळे हे संपूर्ण क्षेत्र लागवडीखाली आलेले नाही. आतापर्यंत २१ हजार हेक्टरपेक्षा अधिक क्षेत्रावर मका लागवड झाली आहे. मोताळा तालुक्यात ५५८१ हेक्टरवर, तर देऊळगावराजा तालुक्यात २१४ हेक्टरवर मका लागवड झाली आहे. या वर्षी घाटाखालील तालुक्यांमध्ये मक्याची लागवड वाढली आहे.

या वर्षी घाटाखाली लागवड वाढण्यास चाराटंचाई तसेच गेल्या वर्षात मक्याला मिळालेला भाव कारणीभूत मानला जात आहे. पाऊस लांबल्याने मूग, उडदाचे क्षेत्र कापूस व मक्यात परावर्तित झाल्याचे कृषी विभागाचे म्हणणे आहे. सध्या हे पीक एक ते दीड महिना कालावधीचे झालेले आहे. दोन ते अडीच फुटांपर्यंत झाडांची वाढ झालेली असून, शेतकरी सध्या फवारणीचे काम करीत आहेत. अनेक शेतकऱ्यांनी अळीची धास्ती घेत एक ते दोन वेळा कीटकनाशकांच्या फवारण्या केल्या आहेत.

कृषी विभागाकडून मक्यावरील या अळीच्या नियंत्रणासाठी मोठ्या प्रमाणात फेरोमोन ट्रॅप्स लावले जाणार आहेत. हे ट्रॅप एक ते दोन दिवसांत जिल्ह्यात दाखल होणार असल्याची माहिती आहे. दैनंदिन निरीक्षणे घेतली जात असून, अळीचा प्रादुर्भाव मोताळा व देऊळगावराजा या दोन तालुक्यांतील काही गावांमध्येच दिसून आलेला आहे.  

प्रतिक्रिया

सध्या या अळीचे दोन टक्क्यांपर्यंत प्रमाण दिसून आले आहे. यामुळे यंत्रणांना तातडीने सर्वेक्षण सुरू करण्याचे निर्देश दिले. शासनाच्या वतीने सर्वत्र फेरोमोन ट्रॅप लावणार आहे. दोन दिवसांत याची अंमलबजावणी सुरू होईल. शेतकऱ्यांना फवारणीबाबतही सूचना केलेल्या आहेत. अद्याप अळीने नुकसान पातळी गाठलेली नाही.
- नरेंद्र नाईक, जिल्हा अधीक्षक कृषी अधिकारी, बुलडाणा

बुलडाणा उपविभागात मोताळा तालुक्यात परडा गावात सात ते आठ ठिकाणी अळीचा प्रादुर्भाव दिसून आला आहे. प्रमाण तितके नाही. सध्या मक्याचे पीक लहान असून, त्यावर फवारणी करता येते. फवारणीची आपण शिफारस केली आहे. शिवाय, फेरोमोन ट्रॅप लावण्याचाही सल्ला दिला आहे. लवकरच ग्रामीण भागात मेळावे सुरू केले जाणार आहे. क्रॉपसॅपअंतर्गत कर्मचाऱ्यांचे प्रशिक्षण घेतले. त्यात कृषी विद्यापीठाच्या कीटकशास्त्रज्ञांनी मार्गदर्शन केले. त्यांना प्रत्यक्ष पाहणी करून उपाययोजना करण्याचे सांगण्यात आले.
- संतोष डाबरे, उपविभागीय कृषी अधिकारी, बुलडाणा

आतापर्यंत एक ते दोन गावांत लष्करी अळीचा प्रादुर्भाव दिसून आला. तेथे आम्ही भेट दिली. आर्थिक नुकसान पातळीच्या (पाच टक्क्यांच्या आत) खाली ही अळी सध्या आहे. देऊळगावराजा तालुक्यातही काही ठिकाणी ही अळी दिसून येत असल्याची माहिती आहे. धाड परिसरात जनुना गावाला भेट दिली तेथे अळीचा प्रादुर्भाव दिसून आला नाही. विद्यापीठाअंतर्गत बुलडाणा येथील संशोधन केंद्राच्या वतीने मकापिकाकडे लक्ष ठेवून आहोत. विद्यापीठाच्या पुढाकाराने टाकळी, मढ या गावात मेळावा घेतला. तसेच, विद्यापीठाने यूपीएलसोबत करार करून टाकळी (धाड), सोयगाव ही दोन गावे दत्तक घेतली आहेत. यानुसार विद्यापीठ तांत्रिक मार्गदर्शन करीत असून, यूपीएल त्यांचे लेबलक्लेम कीटकनाशके वापरण्यासाठी देत आहे. इतर गावांमध्ये कृषी संशोधन केंद्र व कृषी विभाग संयुक्त काम करीत आहेत.
- डॉ. सी. पी. जायभाये, सहयोगी प्राध्यापक, कृषी संशोधन केंद्र, बुलडाणा

मी बुलडाणा जिल्ह्यात जनुना तसेच इतर गावांत मकापिकाची पाहणी केली. लष्करी अळीची नुकतीच सुरवात झाल्याचे दिसून आले.  याशिवाय, नेहमीचा खोड किड्याचा प्रादुर्भाव दिसला आहे. खोड कीडा ही किड दरवर्षी दिसून येते. शेतकऱ्यांनी काय काळजी घ्यावी, याबाबतचे शेड्यूल कृषी अधिकारी व कर्मचाऱ्यांना दिले असून, ते गावपातळीवर आता यानुसार मार्गदर्शन करीत आहेत. 
- डॉ. अनिल कोल्हे, मुख्य पीकसंरक्षण अधिकारी, डॉ.पंजाबराव देशमुख कृषी विद्यापीठ. 


इतर ताज्या घडामोडी
पुणे जिल्ह्यात उन्हामुळे धरणांतील...पुणे ः उन्हाचा चटका वाढल्याने धरणांतील पाण्याचा...
म्हसवड येथे शेतकरी आंदोलन सुरूचम्हसवड, जि. सातारा : शेतजमीन कब्जे वहिवाटीत...
मराठवाड्यात उपयुक्त पाणी ६५.८० टक्केचऔरंगाबाद : मराठवाड्यातील ८७६ प्रकल्पांतील उपयुक्त...
`हिंगोलीत केंद्रीय मसाले मंडळाचे...हिंगोली : हळदीच्या उत्पादकता वाढीसाठी शेतकऱ्यांना...
अवकाळीच्या नुकसानीचे नांदेडमध्ये १८...नांदेड : जिल्ह्यात नुकत्याच झालेल्या अवेळी...
शेतमाल चोरणारी टोळी जेरबंद अमरावती : कोरोनामुळे ग्रामीण भागात निर्माण...
साडेसात हजार खात्यांचे आधार प्रमाणीकरण...नांदेड : ‘‘महात्मा जोतीराव फुले शेतकरी कर्जमुक्ती...
‘ई-फेरफार प्रणालीत नाशिक विभागाची बाजी’नाशिक : ‘‘महसूल विभागाच्या ई-फेरफार प्रणालीत...
भंडाऱ्यात पणन अधिकाऱ्यांच्या समक्षच...भंडारा : जिल्ह्यात धान लागवड क्षेत्र आणि सरासरी...
अकोला जिल्हा बँकेच्या अध्यक्षपदी डॉ....अकोला : अकोला जिल्हा मध्यवर्ती सहकारी बँकेच्या...
महागाई विरोधात स्वाभिमानीचे लवकरच...कोल्हापूर : पेट्रोल, डिझेल, गॅस दरवाढीने...
काजू खरेदी करताना आडकाठी केल्यास पोलिस...सिंधुदुर्गनगरी : सावंतवाडी-दोडामार्ग फळ बागायतदार...
‘म्हैसाळ’चे पाणी बंदिस्त पाइपद्वारे...सांगली ः जलसंपदा विभागाद्वारे म्हैसाळ योजनेच्या...
कायदा मोडणाऱ्या अधिकाऱ्यांवर गुन्हा...उत्तूर, जि. कोल्हापूर : आधी पुनर्वसन मग धरण हा...
‘शेतकरी सन्मान’च्या कामांना आता...औरंगाबाद : येत्या ८ मार्चपासून पंतप्रधान शेतकरी...
मार्च महिन्याची सुरुवातच अकोलेकरांसाठी...अकोला : मार्च महिन्याला सुरुवात होताच यंदाचा...
पंतप्रधानांची शेतकऱ्यांसाठी ‘बुक...नाशिक : देशात मागील काही महिन्यांपासून कृषी...
योजनेत गोंधळ झाल्यास ‘महसूल’ जबाबदार...पुणे : ‘‘कृषी खात्यात आम्ही राबतो व श्रेय महसूल...
ताकारी उपसा सिंचन योजनेचे फक्त आठच पंप...सांगली : ताकारी उपसा जलसिंचन योजना सुरू होऊन १२...
वाशीममध्ये उन्हाळी पिकांच्या लागवडीकडे...वाशीमः या वर्षी पाण्याची उपलब्धता असल्याने...