काँग्रेसच्या विधिमंडळ पक्षनेतेपदी बाळासाहेब थोरात

मुंबई : विधानसभा निवडणुकीच्या तोंडावर काँग्रेसने विधिमंडळ पक्षात फेरबदल केले आहेत. विधिमंडळ पक्षनेतेपदी नगर जिल्ह्यातील ज्येष्ठ नेते बाळासाहेब थोरात यांची निवड करण्यात आली आहे. तर विधानसभेच्या गटनेतेपदी विदर्भातील आमदार विजय वडेट्टीवार यांची नियुक्ती केली आहे. पक्षात नाराज असलेल्या आमदारांची प्रतोदपदी वर्णी लावून त्यांना खूश करण्याचा प्रयत्न काँग्रेसने केला आहे.

लोकसभा निवडणुकीच्या धामधुमीत राधाकृष्ण विखे-पाटील यांनी विधानसभेच्या विरोधी पक्षनेतेपदाचा राजीनामा दिला होता. नेतेपदाचा राजीनामा दिल्यानंतर विखे-पाटील यांनी पक्षालाही सोडचिठ्ठी दिली. या पार्श्वभूमीवर पक्षाचे प्रभारी मल्लिकार्जुन खरगे यांनी शुक्रवारी नव्या नियुक्त्यांबाबत माहिती दिली. काँग्रेसचे राष्ट्रीय सरचिटणीस के. सी. वेणुगोपाल यांनी यासंदर्भातील पत्र खरगे यांना दिले. नगर जिल्ह्यातील विखे-पाटील यांचे राजकीय प्रतिस्पर्धी असलेल्या बाळासाहेब थोरात यांची विधिमंडळ पक्षनेतेपदी निवड करुन विखे-पाटील यांना शह देण्याचा प्रयत्न काँग्रेसने केला आहे. पूर्व विदर्भातील चिमूरचे आमदार विजय वडेट्टीवार यांना गटनेता म्हणून बढती देण्यात आली आहे. वडेट्टीवार हे याआधी उपनेते म्हणून काम करत होते.

विधिमंडळ पक्षाचे उपनेते म्हणून मुंबईतील नसीम खान यांची निवड करण्यात आली आहे. पक्षाच्या मुख्य प्रतोदपदाची जबाबदारी लातूर जिल्ह्यातील आमदार बसवराज पाटील यांच्याकडे देण्यात आली आहे. तर प्रतोद म्हणून के. सी. पाडवी, सुनील केदार, जयकुमार गोरे, यशोमती ठाकूर आणि प्रणिती शिंदे यांची नियुक्ती झाली आहे. पदे मिळालेल्या आमदारांपैकी सुनील केदार आणि जयकुमार गोरे हे भाजपच्या संपर्कात असल्याची चर्चा होती. काँग्रेसने या नाराज आमदारांना पद देऊन त्यांची नाराजी दूर करण्याचा प्रयत्न केला आहे.

विधान परिषदेच्या गटनेतेपदी शरद रणपिसे यांची नेमणूक करण्यात आली आहे. उपनेते म्हणून रामहरी रूपनवर यांची नियुक्ती झाली आहे. भाई जगताप हे विधान परिषदेत काँग्रेसचे प्रतोद राहणार आहेत.