वाशीम जिल्ह्यात ‘सुजलाम सुफलाम’मधून २९७ कामे पूर्ण

वाशीम ः सुजलाम सुफलाम दुष्काळमुक्त महाराष्ट्र अभियानांतर्गत जिल्ह्यातील कारंजा, मानोरा, रिसोड, मालेगाव, मंगरुळपीर आणि वाशीम या सहा तालुक्यांत जलसंधारणाची एकूण २९७ कामे पूर्ण झाली आहेत. १२८ गावांमध्ये ही कामे झाली असून २५ लाख ७७ हजार घनमीटर एवढे काम झाले असल्याची माहिती या अभियानाचे जिल्हा व्यवस्थापक विशाल नागनाथवार यांनी दिली. वाशीम जिल्ह्यात शासनाचा जलसंधारण विभाग व भारतीय जैन संघटनेच्यावतीने सुजलाम सुफलाम दुष्काळमुक्त अभियानांतर्गत नाला खोलीकरण, नद्यांचे खोलीकरण व रुंदीकरण, शेततळे, सीसीटी, डीपसीसीटी, शेतांची बांधबंदिस्ती, माती नालाबांध, गावतलावातील गाळ काढणे आदी कामे १२८ गावात गेल्या सहा महिन्यांत करण्यात आली. या कामाकरिता भारतीय जैन संघटनेकडून २८ जेसीबी व १४ पोकलेड उपलब्ध करून देण्यात आली. याद्वारे जिल्ह्यातील २९७ कामे पूर्ण करण्यात आली. या कामाकरिता शासनाकडून ५३ लाख ८३३ लिटर्स डिझेल वापरण्यात आले. यामध्ये पोकलेंनने ३७ हजार ९४० तास काम करण्यात आले. याकरिता बीजेएसकडून पोकलेन भाडे २ कोटी ९२ लाख रुपये देण्यात आले. तर जेसीबीने १५,९५१ तास काम करण्यात आले.  जलसंधारणाच्या कामाकरिता कृषी विभागाची १८९ कामे तर वनविभागाची १२ कामे, जलसंपदा विभागाची १२ कामे, जलसंधारण विभागाची ४२ कामे व जिल्हा परिषद लघू सिंचन विभागाची ४२ कामे पूर्ण असे एकूण २९७ कामे पूर्ण झाली. पहिल्याच पावसात जलसंधारणाची पात्रे पूर्ण भरलेली सध्या दिसून येत आहेत. या साठलेल्या पाण्यामुळे परिसरातील विहिरीच्या पातळीत वाढ झाली आहे. या कामाकरिता जिल्हाधिकारी ऋषीकेश मोडक यांनी वेळोवेळी मार्गदर्शन केल्याचे श्री. नागनाथवार यांनी सांगितले.