पीएम-किसानच्या पोर्टलवर दीपकचा झाला ‘लाइट’, ‘समाधान’चे ‘सॅटिसफेक्शन

नांदुरा, जि. बुलडाणा ः शेतकऱ्यांना सध्या सर्वच प्रकारच्या मदतींचा निधी हा ऑनलाइन पद्धतीने थेट बँक खात्यात जमा केला जातो. प्रत्येक योजनेच्या लाभासाठी शेतकऱ्यांची माहिती संबंधित साइटवर अपलोड केली जाते. परंतु, ही माहिती साइटवर टाकत असताना असंख्य घोळ होत असून शेतकरी महिनोमहिने लाभापासून वंचित राहत आहेत. प्रधानमंत्री किसान सन्मान निधीपासून हजारो शेतकरी वंचित असून यामागे प्रमुख कारणांमध्ये माहिती चुकीची असणे, नावातील दोष असल्याचे सांगितले जाते. माहिती भरताना गुगल ट्रान्स्लेटच्या माध्यमातून नावाचे थेट अर्थच लिहिले जात असल्याचे समोर आले आहे.  शेतकऱ्यांना आर्थिक मदत व्हावी या हेतूने प्रथमच देशात केंद्र सरकारने ‘पंतप्रधान किसान सन्मान निधी योजना’ जाहीर केली. या योजनेतून शेतकऱ्यांना वर्षाला सहा हजारांची मदत तीन टप्प्यात दिली जाणार आहे. यासाठी पोर्टलवर शेतकऱ्यांची नोंद करण्यात आली. ही नावे व माहिती इंग्रजीत भरण्यासाठी तहसील कार्यालयांनी तात्पुरतचे ऑपरेटर ठेवले होते. त्यांनी मराठीचे इंग्रजी करण्यासाठी गुगल ट्रान्सलेटचा वापर केल्याने इथेच शेतकऱ्यांच्या नावात मोठा घोळ झाला आहे. नांदुरा तालुक्यातील फुली येथील शेतकऱ्याचे नाव ‘समाधान’ असे असताना चक्क ‘सॅटिसफेक्शन’, ‘दीपक’चा ‘लाइट’, ज्यांचे आडनाव वाघ होते त्यांच्या नावासमोर ‘टायगर’, ‘सातव’चे ‘सेवंथ’ करण्यात आले आहे. हा घोळ केवळ नावांपुरताच नसून असे घोळ अनेक गावांत झालेले असून शेतकरी लाभापासून वंचित राहिलेले आहेत. पीएम किसान पोर्टलवर नांदुरा तालुक्यातील फुली गावातील सुभाष प्रल्हाद वाघ यांचे नाव सुभाष प्रल्हाद टायगर, दीपक यादव इंगळे यांचे लाइट यादव इंगळे, जगन्नाथ समाधान बोदडे यांचे जगन्नाथ सॅटिसफेक्शन बोदडे असे लिहून आले. या चुकांमुळे हे लाभार्थी नाव जुळत नसल्याच्या कारणाने वंचित राहिले आहेत. गुगल ट्रान्सलेटरचा वापर पंतप्रधान किसान सन्मान निधी योजनेसाठी लोकसभा निवडणुकीची आचारसंहिता लागण्यापूर्वी शेतकऱ्यांची नोंदणी करण्यासाठी त्या त्या तालुक्यातील तलाठी, कृषी सहायक व ग्रामसेवकांनी माहिती तहसील कार्यालयाला मराठीत सादर केली होती. परंतु, पीएम किसान पोर्टलला ती इंग्रजीत सादर करावयाची असल्याने प्रशासनाने तात्पुरते ऑपरेटर नेमून मराठीतील नावे व माहिती इंग्रजीत करण्यासाठी गुगल ट्रान्सलेटचा सर्रास वापर केला. यातच घोळ झाला. त्यातून नावांचे मजेदार किस्से ही वेबसाइट उघडल्यानंतर दिसू लागले.