द्राक्षबाग वाचविण्यासाठी मणिमंगळसूत्र मोडले

विटा, सांगली ः खानापूर तालुक्यात मॉन्सूनोत्तर पावसाचा निर्यातक्षम द्राक्षांना मोठा फटका बसला. द्राक्षबाग वाचावी यासाठी महागडी कीटकनाशके खरेदी करण्यासाठी पत्नीचे मणिमंगळसूत्र मोडण्याची वेळ सुळेवाडी (ता. खानापूर) येथील दादासो पांडुरंग पवार या शेतकऱ्यावर आली. मात्र, तरीही बागेचे होत्याचे नव्हते झाले. त्यामुळे पवार यांच्या दीड एकर निर्यातक्षम बागेचे सुमारे पंधरा लाख रुपयांचे नुकसान झाले. शासनाने झालेली नुकसानभरपाई तातडीने द्यावी, अशी पवार यांनी मागणी केली आहे. सुळेवाडी येथील दादासो व संतोष पांडुरंग पवार या बंधूंची दीड एकर निर्यातक्षम द्राक्षबाग आहे. आतापर्यंत या बागेचे चार हंगाम मिळाले. मात्र पाचव्या हंगामाला अति झालेल्या पावसाचे ग्रहण लागले. फुलोऱ्यात आलेल्या बागेत पावसाच्या पाण्याने फळकुज, मणिगळ झाली. बागेत साठलेल्या अति पाण्याने मुळकुज झाली. परिणामी बागेच्या ओलांड्यावर मुळ्या फुटल्या आहेत. नुकसान झाले व द्राक्ष घड नाहीत म्हणून बाग सोडताही येत नाही.  आमदार अनिल बाबर, जिल्हाधिकारी डॉ. अभिजित चौधरी, प्रांताधिकारी शंकर बर्गे यांच्यासह अधिकाऱ्यांनी नुकसानीची पाहणी केली. पंचनामे केले. पीक विम्यासाठी अर्ज, भरा असे त्यांनी सांगितले. त्यानुसार पवार यांनी नुकसानभरपाई मिळण्यासाठी धावपळ सुरू केली आहे. शासनाने तातडीने नुकसानीचे पैसे बँक खात्यावर जमा केल्यास बागेचे पुढील नियोजन करता येईल, असे पवार सांगत होते.