भंडारा जिल्ह्यात ९० हजार शेतकऱ्यांनी काढला पीकविमा

भंडारा  ः अनिश्चित पाऊसमान आणि दुष्काळी परिस्थिती यांमुळे शेतकऱ्यांचा प्रधानमंत्री पीकविमा योजनेला वाढता प्रतिसाद मिळत आहे. त्यातूनच जिल्ह्यात सुमारे ९० हजार २४२ शेतकऱ्यांनी ३६ हजार ५६ हेक्‍टर क्षेत्र विमा संरक्षित केले आहे.  भंडारा जिल्हा भात उत्पादनासाठी सर्वदूर ओळखला जातो. एक लाख ७० हजार हेक्‍टर क्षेत्रावर धानाची लागवड होते. परंतु, गेल्या तीन वर्षांपासून जिल्ह्यात दुष्काळी परिस्थितीत असल्याने रोवणीचे काम प्रभावित होत आहे. त्यासोबतच पऱ्हे टाकल्यानंतर पाऊस लांबल्याने त्याचा परिणाम उत्पादकतेवर होत असल्याची स्थिती आहे. परिणामी, अनिश्चित पाऊसमानामुळे पीकविमा काढण्यावर शेतकऱ्यांनी भर दिला आहे. ३१ जुलैपर्यंत रोवणी न झाल्यास विमा संरक्षित रकमेच्या २५ टक्‍के विमा मिळण्याची शक्‍यता आहे. त्यामुळे देखील शेतकऱ्यांनी याला प्रतिसाद दिला आहे. बिगर कर्जदार शेतकऱ्यांना पीकविमा उतरविण्यास बॅंकांनी टाळाटाळ केल्याचा आरोप आहे. सुरवातीला दुष्काळ सदृश परिस्थिती निर्माण झाल्याने बिगर कर्जदार शेतकऱ्यांनी विमा उतरविण्यासाठी बॅंकांत एकच गर्दी केली होती. जिल्ह्यात पीकविमा योजनेच्या शेवटच्या दिवसापर्यंत ९० हजार २४२ शेतकऱ्यांनी ३६ हजार ५६ हेक्‍टर क्षेत्राचा विमा उतरविला आहे. ८३ लाख ७०१ रुपयांचा विमा हप्ता त्यापोटी भरण्यात आला आहे.  दरम्यान, २०१५-१६ या वर्षात ७४ हजार ७८५ शेतकऱ्यांनी ५ कोटी ८९ लाख रुपयांचा विमा हप्ता भरला होता. त्यानंतर एकाही शेतकऱ्याला नुकसानभरपाई मिळाली नाही. २०१६-१७ मध्ये देखील ६६ हजार २३० शेतकऱ्यांव्दारे ९७ लाख रुपयांचा विमा हप्ता भरण्यात आला. यावर्षी देखील विमा भरपाई देण्यात आली नाही. २०१७-१८ मध्ये ६८ हजार २७० शेतकऱ्यांनी ५ कोटी १६ लाख १४ हजाराचा विमा हप्ता भरल्यानंतर केवळ ३१.११ लाख रुपयांची भरपाई देण्यात आली.