पाटण तालुक्यात भातलागणीस वेग

पाटण, जि. सातारा ः तालुक्‍यात मॉन्सूनने २७ जूनपासून लावलेल्या दमदार हजेरीमुळे शेतकऱ्यांत समाधानाचे वातावरण आहे. गेले बारा दिवसांपासून सुरू असलेल्या पावसामुळे भात लागणीच्या कामास तालुक्‍याच्या पश्‍चिम भागात वेग आला आहे. 

संपूर्ण रोहिणी व मृग नक्षत्र कोरडे गेले. १३ जूनच्या दरम्यान दोन दिवस पडलेल्या पावसाचा अपवाद वगळता २७ जूनपर्यंत मॉन्सूनच्या पावसाने दडी मारली होती. त्यामुळे बळिराजा चिंतेत होता. २७ जून रोजी दमदार पावसाचे आगमन झाले व शेतकऱ्यांच्या आशा पल्लवित झाल्या. तालुक्‍यात भातपिकाखालील सर्वसाधारण १६ हजार ४३० हेक्‍टर क्षेत्र असून, त्यापैकी पेरणीचे दहा हजार ६६६ हेक्‍टर व लागणीचे सरासरी सहा हजार ८० हेक्‍टर क्षेत्र आहे. 

नाचणी पुनर्लागणीचे सर्वसाधारण क्षेत्र चार हजार ६५० हेक्‍टर आहे. जूनच्या दुसऱ्या आठवड्यात पडलेल्या पावसात टाकलेले नाचणी व भाताचे तरवे पुनर्लागणीस आले आहेत. पाऊस पडला नसता तर ते वाया जाण्याची भीती होती. मात्र, दोन आठवडे सुरू असलेल्या संततधार पावसाने भात व नाचणी लागणीस तो उपयुक्त आहे. त्यामुळे तालुक्‍याच्या पश्‍चिम भागात भात लागणीस सुरवात झाली आहे. 

डोंगरउतारावर नाचणीची लागवड मोठ्या प्रमाणावर होते. भात लागणीसाठी मजुरांची कमतरता असल्याने पैरा पद्धतीने एकमेकास शेतकरी मदत करताना पहावयास मिळत आहेत. कोयना, मोरणा, चाफळ, केरा, तारळे व ढेबेवाडी विभागाच्या पश्‍चिम भागातील प्रत्येक गावातील शिवारात भात व नाचणी लागणीची लगभग दिसून येत आहे. पारंपरिक पद्धतीने बैलजोडीच्या साह्याने तर काही ठिकाणी आधुनिक पद्धतीने ट्रॅक्‍टरच्या सहाय्याने चिखल करण्याचे काम शेतकरी करताना पाहावयास मिळत आहेत.

जुलैअखेरपर्यंत भातलागणीची कामे चालतील असा अंदाज असून, पडत असलेला मुसळधार पाऊस भात व नाचणीच्या पुनर्लागणीस उपयुक्त असल्याने शेतकरी या कामात व्यस्त असल्याचे चित्र तालुक्‍याच्या पश्‍चिम भागात पहावयास मिळत आहे.