आंतरराष्ट्रीय द्राक्ष चर्चासत्र आजपासून

पुणे: राष्ट्रीय द्राक्ष संशोधन (एनआरसीजी) केंद्राकडून आजपासून (ता. १५) दोन दिवस पुण्यात आंतरराष्ट्रीय चर्चासत्राचे आयोजन करण्यात आले आहे. भारतीय द्राक्ष शेतीची वाटचाल आणि नियोजन या विषयावर शास्त्रज्ञांकडून मंथन केले जाईल.  अमनोरा टाऊनशिपमधील अमनोरा क्लब हाउसमध्ये होत असलेल्या या चर्चासत्रात भारतीय कृषी संशोधन परिषदेच्या फलोत्पादन संशोधन संस्थेचे संचालक डॉ. दिनेशकुमार, अतिरिक्त महासंचालक डॉ. डब्ल्यू. एस. धिल्लन, उपमहासंचालक डॉ. ए. के. सिंग, डॉ. बाळासाहेब सांवत कोकण कृषी विद्यापीठाचे कुलगुरू डॉ. एस. डी. सावंत, डॉ. एस. डी. शिखामणी, डॉ. मुखोपाध्याय, डॉ. सी. डी. मायी, पद्श्री डॉ. के. एल. चढ्ढा तसेच इतर देशविदेशातील १५० शास्त्रज्ञ सहभागी होत आहेत.  भारतातून सध्या ७० देशांना निर्यात केली जाते. २०१७-१८ मध्ये २९५ दशलक्ष डॉलर्सची उलाढाल करणारी ही निर्यात सतत वाढते आहे. मात्र, देशी बाजारासाठी दर्जेदार माल आणि विदेशी बाजारातील स्पर्धा अशा दोन्ही पातळ्यांवर व्यूहरचना करणे अत्यावश्यक असल्याचे शास्त्रज्ञांना वाटते.  आंतरराष्ट्रीय चर्चासत्रात लागवड नियोजन, हवामान बदल, बागांचे आरोग्य, काढणीपश्चात तंत्र-प्रक्रिया आणि अन्न सुरक्षितता तसेच शास्त्रज्ञ व उद्योजक यांच्यातील समन्वय अशा विविध विषयांवर चर्चा होण्याची शक्यता आहे.