बागलाणात खरीप हंगामातील पिके धोक्यात

बागलाणात खरीप हंगामातील पिके धोक्यात
बागलाणात खरीप हंगामातील पिके धोक्यात

नाशिक : या वर्षी बागलाण तालुक्यातील रोहिणी, मृग व आर्द्रा या तिन्ही नक्षत्रांत समाधानकारक पाऊस झालेला नाही. काही शेतकऱ्यांनी धूळवाफेवर पेरण्या केल्या, पीकही उतरून पडले आहे. मात्र, पावसाने दडी मारल्याने दुबार पेरणीचे संकट शेतकऱ्यांसमोर आहे. बागलाण तालुक्यात प्रस्तावित ३८ हजार ८४९ हेक्टर क्षेत्रापैकी १३ हजार ६६५ हेक्टर क्षेत्रावर पेरण्या झाल्या आहेत. केवळ ३७ टक्के क्षेत्रावर पेरणी झाल्याने या वर्षीचा खरीप हंगाम धोक्यात असल्याचे दिसून येत आहे.  जुलै महिनाच्या दुसऱ्या आठवड्यात अजूनही पेरण्या बाकी आहेत. जमिनीची नांगरणी, वखरणी करून शेतकरी पेरणीसाठी सज्ज असला; तरी पाऊस ओढ देत असल्याने हंगामात अडचणी उभ्या राहिल्या आहेत. गेल्या वर्षी पावसामुळे व शेतीमालाला भाव नसल्याने शेतकऱ्यांची आर्थिक स्थिती बिकट होती. परंतु, त्यात शेतकरी कर्ज काढून, उसनवार घेत पेरणीसाठी बियाणे, खते खरेदी करीत आहेत. मात्र, पाऊसच नसल्याने पेरण्या खोळंबल्या असून, तालुक्यातील उत्पादन घटण्याची शक्यता निर्माण झाली आहे. त्यात ज्या शेतकऱ्यांनी भाजीपाला पिके घेतली आहेत; अशा क्षेत्रावर सिंचनाचा प्रश्न गंभीर झाला आहे. तसेच, डाळिंबाच्या फळबागा जळू लागल्या आहेत. त्यामुळे आता प्रत्येक जण पावसाच्या प्रतीक्षेत आहे. 

पाणीटंचाई बिकट बागलाण तालुक्यात चालू महिन्यात केवळ ४७ टक्के पाऊस पडला आहे. या महिन्याचे सरासरी पर्जन्यमान ९७.६० मिमी इतके आहे. त्यामुळे सटाणा शहरात भीषण पाणीटंचाईचा प्रश्न ऐरणीवर आहे. यंदा जुलै महिन्याच्या पहिल्या पंधरवड्यात १०३ मिमी पाऊस झाला. मात्र, या भरवशावर पेरण्या झाल्या असल्या, तरी पिकांसाठी आता ताण पडू लागला आहे. तालुक्यातील केळझर व हरणबारी या दोघाही मध्यम प्रकल्पांमध्ये केवळ ३ टक्के पाणीसाठी आहे. परिणामी, तालुक्यातील हरणबारी, केळझर धरणक्षेत्रासह परिसरातील नदी-नाले कोरडेच आहेत. यामुळे भरपावसाळ्यात पाणीटंचाई कायम असून, ३९ टँकरद्वारे ५१ गावे व खेड्यांमध्ये पाण्याचे टँकर सुरू आहेत. सटाणा शहराला पाणीपुरवठा करणारे चणकापूर व केळझर धरणे कोरडी ठाक असल्याने पिण्याच्या पाण्याचा प्रश्न गंभीर झाला आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com