शिराळा तालुक्यातील तलावांचे मोठे नुकसान

शिराळा, जि. सांगली  ः तालुक्यात या अनेक तलावांचे नुकसान होऊन पावणे तीन कोटींचा फटका बसला आहे. तालुक्यातील मोरणा धरण, करमजाई, मानकरवाडी, शिवाणी, टाकवे, तर वाळवा तालुक्यातील रेठरे धरण व कार्वे हे सात प्रकल्प जलसंपदा विभागांतर्गत येतात. हे प्रकल्प चाळीस वर्षांपूर्वीचे आहेत. त्यांचे स्ट्रक्चरल ऑडिट होणे गरजेचे आहे.

संततधार पावसामुळे मोरणा धरणाच्या सांडव्याखालील बाजूस तीन ठिकाणी भरावा खचून शेतकऱ्यांचे मोठ्या प्रमाणात नुकसान झाले. त्या ठिकाणी ८०० मीटर लांबीची दोन कोटी २० लाख रुपये खर्चाची संरक्षक भिंत बांधावी लागणार आहे. वाकुर्डे बुद्रूक येथील करमजाई तलावाच्या गेटजवळ खालील बाजूस मोठ्या खड्डा पडून रस्ता खचला आहे. त्याच्या दुरुस्तीसाठी २० लाख रुपये खर्च येणार आहे. अंत्री येथील मानकरवाडी तलावाच्या सांडवा भिंतीची अनेक ठिकाणी पडझड झाली आहे. त्यासाठी ३५ लाख खर्च अपेक्षित आहे. अशी सध्यास्थितीला दोन कोटी ७५ लाख रुपयांच्या निधीची गरज आहे.

पावसामुळे तलावांच्या संरक्षण भिंती, सांडवा भिंत यांची पडझड झाल्याने त्यांची दुरुस्ती करावी लागणार आहे. त्या ठिकाणची प्रत्यक्ष पाहणी केली आहे. जवळपास त्यासाठी पावणे तीन कोटी रुपयांची गरज आहे. उर्वरित तलावाची असणारी किरकोळ दुरुस्ती यांचा विचार केला, तर जवळपास दहा कोटींचा खर्च अपेक्षित आहे. - लालासाहेब मोरे, उपविभागीय अभियंता, जलसंपदा विभाग, इस्लामपूर.

गेल्या महिन्यात झालेल्या अतिवृष्टीमुळे मोरणा धरणाच्या सांडव्याच्या पाण्याने प्रवाह बदलला. त्यामुळे दोन एकर जमीन खचून वाहून गेली. दोन एकर क्षेत्रातील ऊस पीक, ठिबक सिंचन पाइप, विद्युत मोटार वाहून गेले. त्यामुळे २० लाखांचे नुकसान झाले. या परिसरातील शेती वाचवण्यासाठी शेती खचलेल्या भागात संरक्षण भिंत घालणे गरजेचे आहे. - प्रवीण शेटे, शेतकरी.