खानदेशातील अनेक मध्यम प्रकल्प ओव्हर फ्लो

खानदेशातील अनेक मध्यम प्रकल्प ओव्हर फ्लो
खानदेशातील अनेक मध्यम प्रकल्प ओव्हर फ्लो

जळगाव ः खानदेशातील जळगाव जिल्ह्याची जीवनवाहिनी असलेल्या गिरणा नदीवरील गिरणा धरण तब्बल पाच वर्षांनंतर ६६ टक्‍क्‍यांपेक्षा अधिक भरले आहे. सोबतच धुळ्यातील बुराई, नंदुरबारमधील दरा, शहादामधील सुसरी हे मध्यम प्रकल्पदेखील तब्बल तीन वर्षांनंतर ओव्हर फ्लो झाले आहेत. कमाल लघु व मध्यम प्रकल्प भरल्याने शेतकऱ्यांमध्ये आनंदाचे वातावरण आहे.  जुलैच्या अखेरीस व २ ऑगस्टपर्यंत धुळ्यातील पांझरा, जळगावमधील तोंडापूर, नंदुरबारमधील रंगावली मध्यम हे प्रकल्प १०० टक्के भरले होते. तर मागील आठ दिवसांतील पावसाने रावेर (जि. जळगाव) तालुक्‍यातील मंगरूळ, सुकी, अभोरा हे मध्यम प्रकल्प, गारबर्डी लघुप्रकल्प, यावलमधील मोर मध्यम प्रकल्प, चोपड्यातील गूळ, नंदुरबारमधील दरा, धुळ्यातील बुराई, मालनगाव, करवंद, नंदुरबारमधील शहादा तालुक्‍यातील सुसरी हे प्रकल्प या आठवड्यातील पावसाने १०० टक्के भरले आहेत. यावलमधील मोर प्रकल्पात ७० टक्के तर चोपड्यातील गूळ प्रकल्पात ६३ टक्‍क्‍यांवर आणि धुळे जिल्ह्यातील शिरपूरमधील अनेर प्रकल्पात ३४ टक्‍क्‍यांवर साठा असून, त्यातील आवक वाढतच आहे. सतर्कता म्हणून मोर, अनेर व गूळ प्रकल्पातून पाण्याचा विसर्ग सुरू आहे. हे तिन्ही प्रकल्पदेखील १०० टक्के भरल्याची शाश्‍वती आहे. हतनूर धरणाचे सर्व ४१ दरवाजे शनिवारी (ता. १०) सकाळा नऊ वाजता उघडण्यात आले होते. या नदीकाठच्या गावांना सतर्कतेचा इशारा पुन्हा एकदा देण्यात आला. मागील १० दिवसांत हतनूरचे सर्व दरवाजे उघडले. जामनेर (जि. जळगाव) तालुक्‍यातील वाघूर प्रकल्पाचा साठा मात्र फारसा वाढलेला नाही.  शनिवारी सकाळी नऊपर्यंत विविध प्रकल्पांमधील साठा (टक्केवारीत) ः  जळगाव ः गिरणा ६६.१३, वाघूर ३६.८३, मोर ७०, गूळ ६३, बोरी ११, बहुळा ११.८८. जळगाव जिल्ह्यातील अग्नावती, हिवरा, भोकरबारी, मन्याड व अंजनी हे प्रकल्प कोरडेच आहेत.  नंदुरबार ः दरा व रंगावली १००, शिवन ७७.६३.  धुळे ः करवंद, मालनगाव, बुराई, पांझरा १०० टक्के, कनोली ०, अमरावती ३७.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com