सूक्ष्म सिंचनाचे अनुदान निधीअभावी रखडले

नांदेड : पंतप्रधान सिंचन योजनेंतर्गत २०१८-१९ मधील शेतकऱ्यांना अनुदान वितरित करण्यासाठी केंद्र शासनाच्या हिश्‍शाचा निधी आहे. परंतु राज्य शासनाच्या हिश्‍शाचा निधी अद्याप प्राप्त न झाल्याने नांदेड, परभणी, हिंगोली जिल्ह्यांतील ४ हजार ३५६ शेतकऱ्यांना अनुदान वाटप करता येत नाही. त्यामुळे राज्य शासनाच्या हिश्‍शाचा निधी तत्काळ उपलब्ध करून देणे आवश्यक आहे.

पंतप्रधान सूक्ष्म सिंचन योजनेंतर्गत २०१८-१९ मध्ये परभणी जिल्ह्यातील २ हजार ४६ शेतकऱ्यांनी सूक्ष्म सिंचन संच अनुदानासाठी कृषी विभागाकडे प्रस्ताव सादर केले. त्यामध्ये १ हजार १७२ शेतकऱ्यांनी १ हजार २४.६३ हेक्टरवरील ठिबक संचासाठी, तर १ हजार २८४ शेतकऱ्यांनी ७१३.६८ हेक्टरवरील तुषार संचासाठी प्रस्ताव सादर केले.

या शेतकऱ्यांना अनुदान वितरित करण्यासाठी केंद्र शासनाच्या हिश्‍शाचा ३ कोटी ८७ लाख रुपये निधी कृषी विभागाकडे प्राप्त झाला आहे. परंतु राज्य शासनाकडील २ कोटी ५८ लाख रुपये निधी प्राप्त झाला नाही. 

नांदेड जिल्ह्यातील १ हजार ४०० शेतकऱ्यांनी प्रस्ताव सादर केले आहेत. केंद्र शासनाचे ३ कोटी रुपये अनुदान प्राप्त झाले आहे. परंतु राज्य शासनाच्या हिश्‍शाच्या २ कोटी रुपये अनुदानाची मागणी करण्यात आली आहे. हिंगोली जिल्ह्यातील ५०० पेक्षा अधिक शेतकऱ्यांचे ठिबक आणि तुषार संचाचे अनुदान राज्य शासनाच्या निधीअभावी रखडले आहे. 

अनुदान वितरित करण्यासाठी राज्य शासनाच्या हिश्‍शाच्या ६ कोटी ५८ लाख रुपये निधीची गरज आहे. हा निधी प्राप्त न झाल्यामुळे शेतकऱ्यांचे अनुदान वाटप रखडले आहे, असे कृषी विभागाच्या सूत्रांनी सांगितले.