तुरळक ठिकाणी पावसाची शक्यता

पुणे ः अरबी समुद्रात तयार झालेल्या महा चक्रीवादाळाची तीव्रता वाढल्याने राज्यातील बहुतांशी भागांत हवामान ढगाळ आहे. यामुळे दिवसभर हवामानात बदल होत आहे. पुणे जिल्ह्यातील हवेली, वेल्हा, शिरूर तालुक्यांतील काही भागांत पावसाच्या हलक्या सरी बरसल्या. नागपूर जिल्ह्यात अनेक भागांत हलका ते मध्यम पाऊस झाला. मराठवाड्यातही काही ठिकाणी हलका पाऊस झाला. पुढील चार ते पाच दिवस हवामान ढगाळ राहणार असून, तुरळक ठिकाणी जोरदार पाऊस पडणार असल्याचा अंदाज हवामान विभागाच्या सूत्रांनी वर्तविला आहे. लक्षद्वीप आणि अरबी समुद्राच्या परिसरात महा नावाचे चक्रीवादळ तयार झाले आहे. या चक्रीवादळाची तीव्रता चांगलीच वाढली आहे. आज या चक्रीवादळाची तीव्रता आणखी वाढणार असून उद्यापासून त्याची तीव्रता कमी होणार आहे. अरबी समुद्रात असलेल्या या चक्रीवादळाचा वेग ताशी २४ किलोमीटर एवढा होता. लक्षद्वीपमधील अमिनीदिवीपासून नैर्ऋत्येकडे ४५० किलोमीटर, तर कर्नाटकातील मंगळुरूपासून ४६० किलोमीटर, गोव्यापासून ३१० किलोमीटर अंतरावर आहे. अरबी समुद्रात असलेल्या क्यार चक्रीवादळाचीही तीव्रता कमी झाली असून ताशी वेग ११ किलोमीटर एवढा आहे. त्यामुळे राज्यातील वातावरणात वेगाने बदल होत आहेत.   सध्या राज्यातील अनेक भागांत ढगाळ हवामान असले तरी दुपारी अधूनमधून ऊन पडत आहे, त्यामुळे कमाल तापमानाचा पारा ३४ अंशांपर्यंत वाढत आहे. दुपारनंतर अचानक वातावरणात बदल होऊन सायंकाळी ढग जमा होऊन पाऊस पडत आहे. मात्र, दुपारी उन्हाच्या वाढलेल्या तापमानामुळे कमाल तापमानाची काही प्रमाणात वाढ असली तरी सरासरीच्या तुलनेत कमाल तापमानात तीन ते चार अंश सेल्सिअसपर्यंत घट झाली आहे. शुक्रवारी (ता. १) सकाळी आठ वाजेपर्यंतच्या चोवीस तासांत मुंबईजवळील सांताक्रूझ येथे सर्वाधिक ३६.९ अंश सेल्सिअस एवढ्या कमाल तापमानाची नोंद झाली आहे. कमाल तापमानाबरोबर किमान तापमानातही चांगली घट झाली आहे. महाबळेश्वर येथे १६.४ अंश सेल्सिअसची सर्वांत कमी किमान तापमानाची नोंद झाली आहे. शुक्रवारी (ता. १) सकाळी आठ वाजेपर्यंत विविध ठिकाणचे कमाल तापमान, कंसात सरासरीच्या तुलनेत झालेली वाढ, घट (अंश सेल्सिअसमध्ये): पुणे २७.६ (-३.५), लोहगाव २८.४ (-३.६), जळगाव ३२.८ (-१.२), कोल्हापूर २८.० (-२.९), महाबळेश्वर २१.८ (-३.७), मालेगाव ३१.० (-१.७), नाशिक २८.१ (-३.६), सांगली २७.६  (-४.१), सातारा २७.१ (-२.९), सोलापूर ३०.२ (-१.८), मुंबई ३३.८, सांताक्रूझ ३४.९ (०.७), अलिबाग ३३.४ (०.२), रत्नागिरी ३३.६ (०.३), डहाणू ३४.२ (०.९), औरंगाबाद २९.० (-२.०), परभणी ३०.० (-१.४), नांदेड ३२.० (-०.३), अकोला ३१.३ (-१.३), अमरावती ३२.० (-०.४), बुलडाणा २९.५ (-०.२), ब्रह्मपुरी ३०.९ (-०.४), चंद्रपूर ३१.६ (-०.२), गोंदिया ३२.२ (०.७), नागपूर ३२.८ (१.२), वाशीम ३०.०, वर्धा ३१.५, यवतमाळ ३९.५ (-१.१)