शनिवारपासून पावसाची उघडीप शक्य

पुणे  : ‘महा’ चक्रीवादळ जमिनीवर आल्यानंतर व विरून गेल्यानंतर पाऊस उघडीप देण्याची शक्यता आहे. शनिवारी (ता. ९) राज्याच्या बहुतांशी भागांत मुख्यत: कोरड्या हवामानाचा अंदाज आहे. पाऊस थांबताच उत्तरेकडील वाऱ्यांचे प्रवाह महाराष्ट्राकडे येण्यास सुरुवात होऊन थंडीची चाहूल लागणार आहे. मात्र कडाक्याच्या थंडीसाठी आणखी काही दिवस वाट पाहावी लागणार आहे. ‘महा’ चक्रीवादळामुळे आज (ता.६) कोकण, मध्य महाराष्ट्राच्या उत्तर भागात मुसळधार पावसाची शक्यता आहे. तर मराठवाड्यासह उर्वरित राज्यात तुरळक ठिकाणी हलक्या ते मध्यम पावसाचा अंदाज आहे. राज्यात शुक्रवारपर्यंत (ता. ८) तुरळक ठिकाणी पावसाची शक्यता आहे. शनिवारी (ता. ९) मध्य महाराष्ट्रात तुरळक ठिकाणी पाऊस शक्य असून, उर्वरित राज्यात हवामान कोरडे होईल. तर बंगालच्या उपसागरात तयार होत असलेल्या ‘बुलबुल’ चक्रीवादळामुळे उत्तरेकडील बाष्प खेचले जाईल, त्या बरोबरच थंड हवा विदर्भ, मराठवाड्याकडे येण्यास सुरवात होईल. हे चक्रीवादळ ओडिशालगतच्या समुद्रात असताना पूर्व विदर्भात हलक्या पावसाची शक्यता आहे. बुलबुल वादळ बंगालकडे गेल्यानंतर साधारणत: नोव्हेंबरच्या तिसऱ्या आठवड्यापासून राज्यात थंडीचा कडाका वाढण्याची शक्यता आहे.     गारा वारा यामुळे थंडीची चाहूल लागली आहे. मात्र सकाळपासूनच उन्हाचा चटका वाढत आहे. तर दुपारनंतर ढग जमा होऊन वादळी पाऊसही पडत आहे. हवामानातील वेगवान बदलाने तापमानात चढ-उतार होत आहेत. मंगळवारी (ता. ५) सकाळी राज्यात किमान तापमान १७ ते २४ अंशांदरम्यान होते. सकाळपर्यंतच्या २४ तासांमध्ये ब्रह्मपुरी येथे ३४.१ अंश सेल्सिअस तापमानाची नोंद झाली.    मंगळवारी (ता. ५) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३१.५ (०.७), जळगाव ३२.८(-०.७), कोल्हापूर ३०.६(-०.२), महाबळेश्वर २३.३(-२.३), मालेगाव २९.२ (-३.१), नाशिक ३१.० (-०.४), सातारा २९.८ (०.३), सोलापूर ३३.० (१.३), अलिबाग ३०.६ (-२.६), डहाणू ३२.४ (-०.६), सांताक्रूझ ३२.९ (-१.३), रत्नागिरी ३२.०(-१.८), औरंगाबाद ३०.५ (-०.१), परभणी ३२.० (०.९), अकोला ३२.८ (०.५), अमरावती ३२.४ (०.३), बुलडाणा २९.० (-०.१), ब्रह्मपुरी ३४.१ (३.०), चंद्रपूर ३३.०(१.६), गोंदिया ३१.८(०.७), नागपूर ३३.२ (२.०), वर्धा ३३.१ (१.६).