चाडेगाव येथे बिबट्याला पकडण्यात यश

नाशिक ः नाशिक तालुक्यातील चाडेगाव शिवारात नर बिबट्याला बुधवारी (ता. १०) सकाळी पकडण्यात वनविभागाच्या बचाव पथकाला यश आले आहे.   एकलहरे, चाडेगाव शिवारात उसाचे क्षेत्र मोठ्या प्रमाणावर आहे. त्यामुळे बिबट्याचा वावर आहे. मागील काही दिवसांपासून येथील शेतमळ्यांमध्ये बिबट्या शेतमजुरांना दिसून आल्याने या भागात भीतीचे वातावरण पसरले होते. त्यामुळे या भागात पिंजरा लावण्याची मागणी रहिवाशांकडून जोर धरू लागली होती. वनविभागाच्या बचाव पथकाने घटनास्थळी जाऊन पूर्व पाहणी करत बिबट्याचा अंदाज बांधला. बुधवारी सकाळी या भागात लावलेल्या एका पिंजऱ्यात बिबट्या भक्ष्याच्या शोधात अडकला. याबाबत शेतकऱ्यांनी वनरक्षकांना बिबट्या पिंजऱ्यात आल्याची माहिती कळविली. त्यानंतर वनपरिक्षेत्र अधिकारी रवींद्र भोगे, वनपरिमंडळ अधिकारी मधुकर गोसावी, वनरक्षक गोविंद पंढरे आदींनी घटनास्थळी धाव घेऊन बिबट्याचा पिंजरा सुरक्षितरीत्या रेस्क्यू व्हॅनमध्ये ठेवून बघ्यांच्या गर्दीतून गंगापूर रोपवाटिकेच्या दिशेने हलविला. नागरिकांनी सावधगिरीने शेतीवरील कामे उरकावी. सकाळी सूर्योदयानंतरच शेतीवर जावे व सायंकाळी सूर्यास्तापूर्वी शेतीचा परिसर सोडावा, असे आवाहन वनविभागाने केले आहे.