शासकीय हमीभाव केंद्र सुरू करा ः सोयाबीन उत्पादक शेतकऱ्यांची मागणी

दारव्हा, यवतमाळ  ः बाजारात नव्या सोयाबीनची आवक सुरू झाली आहे. त्यामुळे आत्तापासूनच सोयाबीन नोंदणी सुरू करून शासकीय खरेदीचा पर्याय शेतकऱ्यांना उपलब्ध करून द्यावा, अशी मागणी तालुक्‍यातील शेतकऱ्यांमधून होत आहे. मूग, उडदाच्या हमीभावाने खरेदीसाठी केंद्र उघडणे व त्याकरिता ऑनलाइन नोंदणीची जाहिरात सध्या शासकीय पातळीवर केली जात आहे. परंतु अद्याप कोठेच हमीभाव केंद्र उघडण्यात आले नाही. त्यामुळे या माध्यमातून दिशाभूल केली जात असल्याचा आरोप शेतकरी करीत आहेत. शासन केंद्र सुरू करण्यास उशीर करते. सध्या दिवाळी सण तोंडावर असल्याने शेतकऱ्यांना पैशाची गरज आहे. परिणामी, शासकीय केंद्र सुरू होण्यास उशीर झाल्यास शेतकरी आर्थिक गरजेपायी खुल्या बाजारात आपला शेतमाल विकून मोकळा होतो. नंतर त्याच्याच टोकणवर व्यापारी आपल्याकडील शेतमाल हमीभावाने विकतात. हे  प्रकार टाळण्यासाठी वेळीच खरेदी केंद्र सुरू होण्याची गरज आहे. मूग, उडदाच्या बाबतीत देखील शासनस्तरावरून दुर्लक्ष करण्यात आले. मूग, उडीद बाजारात येऊन महिना उलटला. पण केंद्र सुरू झाले नाही. नाइलाजाने शेतकऱ्याने कमी भावात आपला शेतमाल विकावा लागला. सोयाबीन उत्पादकांची देखील अशीच अवस्था होऊ नये याकरिता नाफेडमार्फत केंद्र आत्तापासून सुरू करण्यात यावे, अशी मागणी आहे. त्याकरिता ऑनलाइन नोंदणीची प्रक्रिया राबवावी आणि तत्काळ खरेदी देखील करण्यात यावी, असेही शेतकऱ्यांचे म्हणणे आहे. हमीभाव केंद्र सुरू न झाल्यास कमी दरात सोयाबीनची खरेदी व्यापारी करतील. नंतर हाच माल छुप्या मार्गाने शासकीय खरेदी केंद्रावर येईल, अशी भिती वर्तविली जात आहे.