लाल कांद्याची लागवड वाढण्याची शक्‍यता

जळगाव ः खानदेशात आगाप कांदा लागवडीसंबंधी रोपवाटिका तयार करायला सुरवात झाली आहे. तसेच काही शेतकरी पांढऱ्या कांद्याची यंत्राद्वारे पेरणी करीत आहेत. लाल कांद्याची लागवड खानदेशात या हंगामात वाढण्याची शक्‍यता आहे.  हिवाळ्यात किंवा दिवाळीदरम्यान काढणीला येणाऱ्या कांद्याची खानदेशात ऑगस्टमध्ये लागवड केली जाते. यासाठी अनेक  शेतकऱ्यांनी रोपवाटिका तयार केल्या आहेत. तर काही शेतकऱ्यांनी याच आठवड्यात रोपवाटिकेत बियाणे टाकले आहे. खानदेशात काही कंपन्यांनी करार पद्धतीने कांदा लागवड हाती घेतली आहे. जळगाव जिल्ह्यात रावेर, यावल, चोपडा, धुळ्यातील शिरपूर, नंदुरबारमधील शहादा भागात पांढऱ्या कांद्याच्या बियाण्याची पेरणी शेतकऱ्यांनी सुरू केली आहे. तर लाल कांद्याच्या उत्पादनासंबंधी अनेक शेतकऱ्यांनी आपले एक ते दोन एकर क्षेत्र नापेर ठेवले आहे. त्यात ऑगस्टमध्ये कांदा रोपांची लागवड केली जाईल. काही शेतकरी रोपवाटिका तयार करण्याऐवजी रोपांची खरेदी करण्यासंबंधी नियोजन करीत आहेत. लाल कांद्याची लागवड खानदेशात धुळे जिल्ह्यातील धुळे, शिंदखेडा, साक्री, शिरपूर, जळगावमधील एरंडोल, पाचोरा, धरणगाव, यावल, जामनेर या भागात बऱ्यापैकी होईल, असा अंदाज आहे. या हंगामात पावसाची स्थिती बरी असल्याने लाल कांद्याची लागवड मागील हंगामाच्या तुलनेत ३०० ते ४०० हेक्‍टरने वाढू शकते, असा अंदाजही व्यक्त केला जात आहे. कांद्याचे दर जूनच्या अखेरीस सुधारले. सध्या बाजारात प्रतिक्विंटल ४५० ते १२०० रुपयांपर्यंतचे दर आहेत. धुळ्यातील धुळे, साक्री, जळगावमधील चाळीसगाव, अडावद (ता. चोपडा), किनगाव (ता. यावल), जळगाव येथील बाजारात कांद्याची आवक कमी झाली आहे. पांढऱ्या कांद्याची तर कुठलीही आवक सध्या नाही. दर टिकून असल्याने अनेक शेतकरी कांदा लागवडीसंबंधी नियोजन करीत आहेत.