प्रत्येक हंगामातून नवे शिकेल तोच खरा शेतकरी

The true farmer will learn new from each season
The true farmer will learn new from each season

सडक अर्जुनी, जि. गोंदिया ः शेतकऱ्यांनी हंगामनिहाय गणित शिकावे. हंगामाबरोबर जो शिकेल, तोच खरा शेतकरी, असे प्रतिपादन नागपूरचे कृषितज्ज्ञ डॉ. गिरीश निखाडे यांनी केले.

कृषी तंत्रज्ञान व्यवस्थापन यंत्रणा (आत्मा) आणि तालुका कृषी अधिकारी कार्यालय यांच्या संयुक्‍त सहकार्याने तहसील कार्यालयाच्या सभागृहात आयोजित शेतकरी प्रशिक्षणात ते बोलत होते. 

‘भाजीपाला व्यवस्थापन व निर्यात’ या विषयावर या प्रशिक्षणाचे आयोजन करण्यात आले होते. पंचायत समिती सभापती गिरधारी हत्तीमारे यांच्या हस्ते प्रशिक्षण वर्गाचे उद्‍घाटन झाले. निर्यातदार तसेच मित्राय फार्मर प्रोड्यूसर कंपनीचे प्रफुल्ल बांडबुचे यांची या वेळी उपस्थिती होती. 

दर्जेदार बियाण्यांचा वापर वाढविल्यास त्यानुसार पिकाची उत्पादकता मिळते. कीड-रोगांना कमी बळी पडणारे वाणही निवडावे, असे डॉ. गिरीश निखाडे यांनी सांगितले. पाण्याचा अपव्यय तंत्रज्ञानाचा वापर याविषयी त्यांनी मार्गदर्शन केले. प्रफुल्ल बांडबुचे यांनी बाजारपेठेचा अभ्यास करूनच शेतकऱ्यांनी भाजीपाला लागवड करावी. मार्केटमध्ये विकला जाईल यापेक्षाही ज्याला मागणी असेल, अशा पीक पद्धतीचा पर्याय अंगीकारावा, असे सांगितले. स्थानिकच नाही, तर आंतरराष्ट्रीय स्तरावरील बाजारपेठही अशावेळी नजरेत ठेवावी, असे ते म्हणाले. 

पिकलेल्या मालाला विकण्याचे कौशल्य आत्मसात केल्याशिवाय आर्थिक समृद्धी येणार नाही. त्यामुळे हे कौशल्य प्रत्येक शेतकऱ्याने अंगी बिंबवावे. तालुका कृषी अधिकारी किशोर पात्रीकर यांनी शेतकऱ्यांनी व्यापारी तत्त्वावर शेती करण्याचा सल्ला दिला. त्यांनी भाजीपाला लागवड निर्यात व्यवस्थापनाचे महत्त्व पटवून दिले. तालुका तंत्रज्ञान व्यवस्थापक राखी कहालकर यांनी भाजीपाला पिकाचे मानवी जीवनात असलेले महत्त्व विशद करून भाजीपाला लागवडीपासून अधिकाधिक फायदा घेण्यासाठी बाजारपेठ अभ्यासावर भर देण्यास सांगितले. 

सूत्रसंचालन कु. आर. जी. कहालकर यांनी केले. सहायक तंत्रज्ञान व्यवस्थापक जी. सी. मस्के यांनी आभार मानले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com