गिरणा, वाघूरमधील जलसाठ्यात वाढ सुरूच

जळगाव ः खानदेशातील अनेक मध्यम प्रकल्प १०० टक्के भरले असून, जळगाव जिल्ह्यासाठी महत्त्वाचा असलेल्या गिरणा व वाघूर या मोठ्या प्रकल्पांमधील जलसाठाही वाढत आहे. सोमवारी (ता. १२) सकाळी सहा वाजेपर्यंत गिरणा धरणात ७३.०१ टक्के तर वाघूरमध्ये ३९.१६ टक्‍के जलसाठा झाला.  पावसाने विश्रांती घेतलेली असली तरी वाघूरचे लाभक्षेत्र असलेल्या चाळीसगाव, पाचोरा व औरंगाबादमधील सोयगावनजीकच्या डोंगररांगा, सातमाळ्याच्या भागात हलका, मध्यम पाऊस सुरूच आहे. यामुळे या प्रकल्पाचा साठा मागील दोन दिवसांत पाच टक्‍क्‍यांनी वाढला. तर गिरणा धरणाचे लाभक्षेत्र असलेल्या गुजरातमधील सापुतारा, नाशिक जिल्ह्यातील मालेगाव व लगतच्या भागातही बऱ्यापैकी पर्जन्यवृष्टी झाल्याने या धरणाचा साठा पाच वर्षांनंतर ७३ टक्‍क्‍यांवर पोचला आहे. मागील वर्षी गिरणा प्रकल्प जेमतेम सुमारे ४० टक्केच भरला होता.  खानदेशातील या प्रकल्पांमधून विसर्ग खानदेशात मुक्ताईनगर (जि. जळगाव) नजीकच्या तापी नदीवरील हतनूर धरणाचे १४ दरवाजे सोमवारी सकाळी ९ वाजेपर्यंत पूर्ण उघडे होते. जळगाव जिल्ह्यात चोपडा (जि. जळगाव) तालुक्‍यातील गूळ, रावेरातील गारबर्डी लघुप्रकल्प, मंगरूळ व सुकी मध्यम प्रकल्पातून विसर्ग सुरू होता. धुळ्यातील शिरपूर तालुक्‍यातील अनेर प्रकल्पाचे १० दरवाजे सोमवारी सकाळी पूर्ण उघडे होते. तसेच धुळे तालुक्‍यातील पांझरा, जामखेडी या प्रकल्पांतूनही पाण्याचा विसर्ग सुरू होता. नंदुरबारमधील रंगावली प्रकल्पासह तापी नदीवरील सारंगखेडा व प्रकाशा बॅरेजचे सर्व दरवाजे उघडे होते.  हे प्रकल्प कोरडे व भरण्याची प्रतीक्षा जळगाव जिल्ह्यातील पश्‍चिम भागातील हिवरा, भोकरबारी, मन्याड, अंजनी, अग्नावती हे प्रकल्प कोरडेच आहेत. तर बोरी प्रकल्पात १६.६२ आणि बहुळामध्ये १४.९२ टक्के जलसाठा झाला आहे. यावलमधील मोर प्रकल्पात सुमारे ७३ टक्के जलसाठा होता. त्याच्या सांडव्यातून विसर्ग सुरू आहे. धुळे जिल्ह्यातील अमरावती प्रकल्पात ३७.६९ टक्के, दर नंदुरबारमधील शिवन प्रकल्पात ८६.१० टक्के जलसाठा होता.  १०० टक्के भरलेले प्रकल्प  जळगाव जिल्हा - मंगरूळ, सुकी, अभोरा, तोंडापूर. धुळे - पांझरा, मालनगाव, बुराई, करवंद, जामखेडी. नंदुरबार - दरा, रंगावली.