कृषी आयुक्त दिवसेंची बदली, गायकवाड पुन्हा साखर आयुक्त 

मुंबई : राज्य सरकारने शनिवारी महत्त्वपूर्ण बदल्या करत पुन्हा एकदा धक्का दिला आहे. यात प्रामुख्याने कृषी आयुक्त सुहास दिवसे यांची पीएमआरडीएच्या मुख्य कार्यकारी अधिकारीपदी, तर पुणे महानगरपालिका आयुक्त शेखर गायकवाड यांची पुन्हा साखर आयुक्त पदी बदली करण्यात आली आहे. श्री.दिवसे यांच्या बदलीमुळे रिक्त झालेल्या कृषी आयुक्त पदावर आता कुणाची वर्णी लागते राज्याचे लक्ष लागले आहे. 

राज्य सरकारचे बदल्यांचे सत्र सध्या सुरू आहेत. यात शनिवारी पुन्हा आयएएस दर्जाच्या अधिकाऱ्यांच्या बदल्या करण्यात आल्या आहेत. राज्याचे कृषी आयुक्त सुहास दिवसे यांची एमएमआरडीच्या मुख्य कार्यकारीपदी बदली करण्यात आली असली, तरी नव्या आयुक्तांची घोषणा करण्यात आलेली नाही. तर पुणे महानगरपालिकेचे आयुक्त शेखर गायकवाड यांची साखर आयुक्तपदी पुन्हा नियुक्ती करण्यात आली असून, विद्यमान साखर आयुक्त सौरभ राव यांची विभागीय आयुक्त कार्यालयात विशेष अधिकारी म्हणून नियुक्ती करण्यात आली आहे. 

याशिवाय पीएमआरडीएचे विद्यमान मुख्यकार्यकारी अधिकारी विक्रम कुमार यांची पुणे महानगरपालिका आयुक्तपदी नियुक्ती करण्यात आली. तर एकात्मिक आदिवासी विकास प्रकल्पाचे प्रकल्प अधिकारी जितेंद्र दुडी यांची सांगली जिल्हा परिषदेच्या मुख्य कार्यकारी अधिकारीपदी नियुक्ती करण्यात आली आहे.