डॉक्टरांनाही आता कोरोनाचे भय

नवी दिल्ली : कोरोनाचे भय सर्वसामान्यांबरोबरच आता डॉक्टर आणि वैद्यकीय कर्मचाऱ्यांनाही भेडसावू लागले आहे. त्यामुळे संसर्ग चाचणी करणाऱ्या डॉक्टरांचीही संख्या वाढल्याचे चित्र समोर आले आहे. याचा परिणाम कोरोनाशी लढण्याच्या योजनेवर होणार असल्याने केंद्राचीही चिंता वाढली आहे. त्यामुळे, या वाढत्या चाचण्यांच्या मुळाशी दक्षतेऐवजी भीतीची भावना असल्यास राज्यसरकारांनी डॉक्टर आणि वैद्यकीय कर्मचाऱ्यांचे समुपदेशन करावे, असा सल्लाही केंद्राने दिला आहे. कोरोना संक्रमणग्रस्तांच्या संपर्कात आलेल्या डॉक्टरांनाही लागण झाल्याचे प्रकार वाढले आहेत. कालच येथील सर गंगाराम रुग्णालयातील डॉक्टर, परिचारिकांसह १०८ जणांना कोरोना रुग्णांशी आलेल्या संपर्कामुळे विलगीकरण केंद्रात जावे लागले होते. अशीच काही उदाहरणेही समोर आली आहेत. एका सरकारी वैद्यकीय महाविद्यालयात डॉक्टरांच्या पत्नीने खोकल्यामुळे सीटीस्कॅन केल्यानंतर ही चाचणी घेणाऱ्या प्रशिक्षणार्थी डॉक्टरने थेट विलगीकरण कक्ष गाठला. त्याची खात्री पटविण्यासाठी संबंधित डॉक्टरांच्या पत्नीची कोरोना चाचणी करण्यात आली. ही चाचणी निगेटिव्ह आल्यानंतर प्रशिक्षणार्थी डॉक्टरने सुटकेचा निःश्वास टाकला. अन्य एका वैद्यकीय महाविद्यालयामध्ये कोरोना रुग्ण दाखल झाल्यानंतर त्याच्यावर उपचार करणाऱ्या तीन डॉक्टरांनीही स्वतःची कोरोना चाचणी करून घेतली. तत्पूर्वी ते एकांतवासात गेले होते. एवढेच नव्हे तर कोरोना रुग्णांच्या संपर्कात न येणारे डॉक्टर आणि वैद्यकीय कर्मचारी देखील स्वतःची कोरोना चाचणी करून घेत असल्याचे निदर्शनास आले आहे. त्यातही थकवा, कणकण, किरकोळ ताप असलेल्या डॉक्टरांकडून कोरोना चाचणी करून घेण्याचे प्रकार वाढले असल्याचे सरकारी वैद्यकीय महाविद्यालयाच्या वरिष्ठ डॉक्टरांनी सांगितले. अर्थात, कोरोनाचे जगभरात पसरलेले भय आणि संक्रमणाचा वाढलेला धोका यामुळे अशा चाचण्या होणे स्वाभाविक असल्याची पुस्तीही या डॉक्टरांनी जोडली आहे.