टोमॅटोवरील विषाणुजन्य रोगांसाठी शोधले पर्यावरणपूरक पर्याय 

स्पॅनिश शास्त्रीय संशोधन परिषदेच्या संशोधकांनी टोमॅटोवरील अत्यंत नुकसानकारक ठरणाऱ्या पिवळा लीफ कर्ल या रोगाचे प्रमाण कमी करण्यासाठी दोन पर्यावरणपूरक उपाय शोधले आहेत. अतिनील किरणे रोधक प्लॅस्टिकखाली टोमॅटोची लागवड आणि सॅलिसिलिक आम्लाचा नियंत्रणासाठी वापर फायदेशीर ठरत असल्याचा दावा त्यांनी केला आहे.  टोमॅटोवरील पिवळा लीफ कर्ल हा सर्वांत नुकसानकारक रोग आहे. जगभरातील टोमॅटो उत्पादकांसह अर्थव्यवस्थेसाठीही धोकादायक ठरू शकतो. या रोगाचा सामना करण्यासाठी कीडनाशकांचा मोठ्या प्रमाणात वापर केला जातो. मात्र, गेल्या काही वर्षांपासून या उपाययोजनांचे पर्यावरण आणि मानवी आरोग्यावर विपरीत परिणाम होत असल्याचे दिसून येत आहे. या रोगासाठी प्रतिकारक अशा संकरित जातीचा वापर काही शेतकरी करत असले तरी, मूळ टोमॅटोची चव मिळत नसल्याची ग्राहकांची तक्रार होत होती. पर्यायाने मागणीवर परिणाम होतो, असे अनेकांचे मत होते. अशा समस्यांवर मात करण्याबरोबरच पर्यावरणपूरक ठरणाऱ्या उपायांचा शोध जगभरातील शास्त्रज्ञ घेत आहेत. स्पॅनिश कॉन्सिल ऑफ सायन्टिफिक रिसर्च येथील संशोधकांनी अशाच विषाणूजन्य रोगांवर मात करण्यासाठी दोन पर्यायी पद्धतीचा शोध लावला आहे. त्याच्या चाचण्या हरितगृह आणि बाह्य शेतामध्ये सलग तीन वर्षे घेण्यात आल्या असून, त्याचे निष्कर्ष समाधानकारक आहेत.  १. अतिनील किरणे रोखणाऱ्या प्लॅस्टिक खाली लावण्यात आलेल्या टोमॅटो रोपांमध्ये पिवळ्या लीफ कर्ल रोगांचा प्रादुर्भाव कमी झाला.  २. टोमॅटो रोपांची संरक्षण यंत्रणा कार्यान्वित होण्यासाठी सॅलिसिलिक आम्लाचा वापर फायदेशीर ठरत असल्याचे दिसून आले.  अधिक चांगले निष्कर्ष मिळण्यासाठी संशोधकांनी दोन्ही उपाययोजना एकत्रित वापरण्याचे सुचवले आहे. या दोन्ही पद्धती विषाणुजन्य रोगांपासून संरक्षित आणि बाह्य शेतावरील व्यावसायिक टोमॅटो पिकांचा बचाव करण्यासाठी अत्यंत फायदेशीर ठरू शकतात. हे निष्कर्ष प्लॅंट डिसीज या संशोधन पत्रिकेमध्ये प्रकाशित करण्यात आले आहेत.