दक्षिण महाराष्ट्रात केळी लागवडीत यंदाही घट

कोल्हापूर  ः गेल्या वर्षी कमी असलेला दर व अवर्षणामुळे यंदा दक्षिण महाराष्ट्रात केळी लागवडीत घट झाली आहे. गेल्या वर्षीही पाऊस नसल्याने केळीची लागवड कमी झाली होती. यंदाही त्यात विशेष वाढ झाली नाही.  कोल्हापूर व सांगली जिल्ह्यात एकूण सुमारे तीन हजार एकर इतके केळीचे क्षेत्र आहे. गेल्या वर्षी केळीचे दर टनास तीन हजार रुपयांच्या खाली गेले. यामुळे शेतकऱ्यांनी केळीची लागवड टाळली. त्यातच पाऊस व जिल्ह्यातील धरणांमध्ये आणीबाणीची स्थिती निर्माण झाल्याने शेतकऱ्यांनी केळी लागवडीकडे पाठ फिरविली. यंदाही या स्थितीत फारसा फरक झाला नसल्याचे केळी उद्योगातील सूत्रांचे म्हणणे आहे. 

उसापाठोपाठ शेतकरी केळी पिकाला महत्त्व देतात. गेल्या वर्षी केळीच्या तुलनेत उसाला चांगला दर मिळाला. यंदाही केंद्राने एफआरपीच्या रकमेत वाढ केल्याने उसाला टनाला तीन हजार रुपयांपेक्षा अधिक दर मिळण्याची आशा निर्माण झाली आहे. यामुळे यंदाही शेतकरी उसालाच प्राधान्य देत असल्याचे चित्र आहे.

पावसाने दडी मारल्याने मध्यंतरी काही काळ उसाची लागवडही थांबली होती. पण जलाशयांत पुरेसे पाणी असल्याने शेतकऱ्यांनी पुन्हा ऊस लागवडीकडे लक्ष दिले आहे. यामुळे दक्षिण महाराष्ट्रात यंदाही केळीची लागवड समाधानकारक नसल्याचे चित्र आहे. अनेक केळी उत्पादकांनी केळीचे क्षेत्र कमी करून पुन्हा उस लागवड केली आहे. यामुळे जितकी लागवड अपेक्षित होती तितकी झाली नाही.

सध्या या भागातही केळी रोपवाटिका आहेत. या रोपवाटिकांतून राज्यभरातून केळीची रोपे पाठविली जातात. गेल्या वर्षीच्या तुलनेत राज्याच्या इतर भागातून केळी रोपांची मागणी कायम असली तरी कोल्हापूर, सांगली जिल्ह्यातून मात्र केळीची रोपांची मागणी खूपच कमी असल्याचे रोपवाटिका चालकांनी सांगितले. उसाच्या दरवाढीमुळे केळीला सध्या चांगला दर मिळूनही शेतकरी केळीचे उत्पादन घेण्यास दुर्लक्ष करीत असल्याचे चित्र दक्षिण महाराष्ट्रात आहे.