फुटवे अवस्था (गरव्या आणि निमगरव्या जाती) आणि पोटरी ते फुलोरा अवस्था (हळव्या जाती) पुढील पाच दिवस हलक्या ते मध्यम पाऊसाची शक्यता आहे. गरवे ते निमगरवे भात पीक फुटवे अवस्थेत असल्याने भात खाचरात पाण्याची पातळी ५ सें.मी. पर्यंत आणि हळवे भात पीक पोटरी ते फुलोरा अवस्थेत असल्याने पाण्याची पातळी ५ ते १० सें.मी.पर्यंत नियंत्रित ठेवावी. हळवे भात पीक फुलोरा अवस्थेत असताना नत्र खताची तिसरी मात्रा १७ किलो युरिया प्रती एकर पावसाची उघडीप असताना द्यावी. पावसाची उघडझाप व ढगाळ वातावरण राहण्याची शक्यता असल्यामुळे, भात पिकावर बुरशीजन्य करपा रोगाचा प्रादुर्भाव होऊ शकतो. या रोगामुळे पानांवर ठिपके तयार होऊन पाने करपून रोपांची वाढ खुंटते. करपा रोगाचा प्रादुर्भाव दिसून आल्यास, नियंत्रणासाठी फवारणी प्रति लिटर पाणी ट्रायसायक्लॅझोल (७५ टक्के पाण्यात मिसळणारी भुकटी) १ ग्रॅम. भात पिकावर खोडकिडीचा आणि पाने गुंडाळणाऱ्या अळीचा प्रादुर्भाव दिसून येत आहेत. पिकाचे निरीक्षण करून प्रादुर्भाव दिसताच किडीच्या नियंत्रणासाठी, कारटॅप हायड्रोक्लोराईड (४ टक्के दाणेदार) ७.५ किलो किंवा क्लोरॲण्ट्रानीलीप्रोल (०.४ टक्के दाणेदार) ४ किलो किंवा फिप्रोनील (०.३ टक्के दाणेदार) ८.३ किलो प्रति एकर या प्रमाणात जमिनीत पूरेसा ओलावा असताना वापर करावा. -खोडकिडींच्या नियंत्रणासाठी शेतामध्ये २०-२५ मीटर अंतरावर एक असे ८ गंध सापळे प्रति एकरी लावावेत. रायगड जिल्ह्यातील माणगाव तालुक्यातील काही भागामध्ये भात पिकावर नाकतोड्यांचा प्रादुर्भाव दिसून येत आहे. त्यांच्या नियंत्रणासाठी, फवारणी प्रति लिटर पाणी क्लोरपायरीफॉस (२० टक्के प्रवाही) २.४ मि.ली. किंवा डेल्टामेथ्रीन (२.८ टक्के प्रवाही) १.८ मि. ली. किंवा लॅम्बडा सायहॅलोथ्रीन (५ टक्के प्रवाही) ०.८ मि.ली. (या कीटकनाशकास लेबल क्लेम नाही.) नागली पिक पुर्नलागवडीनंतर एक महिन्याने गरजेनुसार बेणणी करावी. बेणणी केल्यानंतर नत्र खताचा दुसरी मात्रा ३५ किलो युरिया प्रति एकरी या प्रमाणात पावसाची उघडीप असताना द्यावी. नारळ बागेतील सुकलेल्या झावळ्या, पालापाचोळा, गवत काढून बागेत स्वच्छता ठेवावी. त्यामुळे नारळावरील गेंडाभुंगा या किडीच्या नियंत्रणास मदत होईल. या भुंग्याची पैदास ही शेणखताच्या खड्ड्यात होते. बागेजवळ शेणखताचे खड्डे असल्यास अशा खड्ड्यात दर दोन महिन्यांनी १.५ टक्का क्लोरपायरीफॉस भुकटी मिसळावी. उपद्रव झालेल्या माडांच्या नवीन छिद्रातून (सुईतून) तारेच्या हुकाने भुंगे बाहेर काढून नष्ट करावेत. सुईत सुमारे क्लोरपायरीफॉस (१.५ टक्का) २५ ग्रॅम आणि बारीक वाळू यांचे १ : १ या प्रमाणात केलेले मिश्रण भरावे. बागेत गेंडा भुंग्याचा गंध सापळा लावावा. ढगाळ वातावरण व आर्द्रतेमुळे वेलवर्गीय भाजीपाला पिकांमध्ये केवडा रोगाचा प्रादुर्भाव होण्याची शक्यता आहे. रोगाचा प्रादुर्भाव दिसून आल्यास नियंत्रणासाठी रोगग्रस्त पाने काढून नष्ट करावीत. मॅन्कोझेब किंवा झायनेब २.५ ग्रॅम प्रति लिटर या प्रमाणात फवारणी करावी. डॉ. विजय मोरे, ९४२२३७४००१ (कृषी विद्या विभाग, डॉ. बाळासाहेब सावंत कोकण कृषी विद्यापीठ, दापोली)
