आजच्या जगामध्ये सामाजिक आर्थिक निकषांमध्ये वेगाने बदल होत आहेत. १९७० आणि ८० च्या दशकाच्या तुलनेमध्ये आनंद आणि संपत्ती यांचा संबंध अधिक दाट होत गेल्याचे सॅन दियागो राज्य विद्यापीठातील संशोधकांचे मत आहे. हे संशोधन ‘जर्नल इमोशन’ मध्ये प्रकाशित करण्यात आले आहे. गेल्या काही दशकांमध्ये माणसांची जीवनशैली वेगाने बदलत आहे. या बदलत्या जीवनशैलीशी मिळवून घेण्यासाठी आर्थिक घटक अत्यंत महत्त्वाचे ठरत आहेत. अशा वेळी सॅन दियागो राज्य विद्यापीठातील संशोधकांनी केलेल्या अभ्यासामध्ये आनंद या घटकाशी उत्पन्न आणि शिक्षण यांचा संबंध असल्याचे नोंदवण्यात आले आहे. म्हणजेच ज्या लोकांचे उत्पन्न अधिक आहे, ते अधिक आनंदी राहण्याची शक्यता आहे. या विषयी पूर्वी झालेल्या अभ्यासामध्ये उत्पन्नांचा नेमका आकडा मिळवण्याचे प्रयत्न झाले होते. त्यात वार्षिक ७५ हजार डॉलरपेक्षा अधिक उत्पन्न अशी सीमारेषा आखली होती. मात्र, ती फारशी योग्य नसल्याचे संशोधकांना आढळले आहे. मानसशास्त्रज्ञ जेन त्वेंगे यांनी सांगितले की, आनंद आणि उत्पन्न यांचा इतका घनिष्ठ संबंध असल्याचे स्पष्ट झाल्यानंतर आम्हीही आश्चर्यचकित आहोत. मूलभूत गरजा भागल्यानंतरही शिल्लक राहणारा अधिक पैसा म्हणजे अधिक आनंद असे काहीसे समीकरण यातून दिसून येत आहे.
गेल्या काही दशकांमध्ये श्रीमंत हे अधिक श्रीमंत होत असून गरीब अधिक गरीब होत चालले आहेत. या आर्थिक असमानतेमुळे आनंद मिळवण्यातील भेदही निर्माण होत असावा. - जेन त्वेंगे, मानसशास्त्रज्ञ
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.