एकत्रित जेवण्यातून घेतला जातो जास्त आहार

आपल्या मित्र आणि कुटुंबीयांसोबत जेवताना आपल्याला अधिक जेवण जाते, ही तशी सर्वज्ञात बाब आहे. मात्र, त्याची मुळे ही आपल्या सुरवातीच्या पूर्वजांच्या तग धरण्यासाठी आवश्यक बाबींशी जोडलेली असतात. या सर्व प्रक्रियेला सामाजिक सुविधा म्हणून ओळखले जाते. याबाब बर्मिंगहॅम विद्यापीठामध्ये नुकतेच संशोधन करण्यात आले. पूर्वीच्या एका अभ्यासामध्ये एकट्याने जेवण्यापेक्षा अन्य मित्र, कुटुंबीयांसोबत जेवण घेतल्यास ४८ टक्के अधिक अन्न खाल्ले जात असल्याचे दिसून आले होते. हेच प्रमाण स्थूलता असलेल्या महिलांमध्ये २९ टक्क्यांनी अधिक होते. ब्रिटन आणि ऑस्ट्रेलिया येथील बर्मिंगहॅम विद्यापीठातील तज्ज्ञांच्या गटाला खाण्याच्या सवयींमध्ये अन्नांचे प्रमाण कमी अधिक होण्यामध्ये सामाजिकता हा महत्त्वाचा घटक असल्याचे दिसून आले. त्यांनी सामाजिक आहाराच्या एकूण ४२ संशोधनाचे पुन्हा विश्लेषण केले. त्यामागील कार्यकारणभावाचे विश्लेषण त्यांनी केले आहे. प्राचीन शिकारी आणि फळे गोळा करणाऱ्या माणसांच्या गटामध्ये अन्नांची वाटणी होत असे. त्यातून अन्नाची असुरक्षितता कमी होऊन, किमान एक दिवस तरी तग धरणे शक्य होत असे. यातून माणसांकडून मित्रांसोबत अधिक खाल्ले जाते. त्यामध्ये एकमेकांसोबत आहार घेणे हे आनंददायी होते ही बाबही दुर्लक्षित करता येत नाही. याविषयी माहिती देताना डॉ. हेलेन रुड्डॉक यांनी सांगितले, की आम्हाला सामाजिकतेमुळे आहारातील प्रमाण वाढत असल्याचे स्पष्ट पुरावे आढळले आहेत. मात्र, ज्या बाबी मित्र आणि कुटुंबीयांसोबत घडतात, त्याच अनोळखी व्यक्तींसोबत आहार घेताना घडतात का, हे पाहणेही आवश्यक होते. अनोळखी व्यक्तींमध्येही आपल्याबाबत चांगला संदेश जावा, यासाठी लोक प्रयत्न करतात. हा परिणाम विशेषतः त्यांच्यासोबत एखादी महिला असते, त्या वेळी स्पष्टपणे दिसून येतो. त्यातही स्थूल असलेल्या व्यक्तींकडून आपण अन्य व्यक्तींकडून जोखले जाऊ नये, यासाठी प्रयत्न होतो.