शिशुआहारातील शर्करेविषयी अधिक काळजी घेण्याची आवश्यकता

माणसाच्या आरोग्याला हानिकारक खाद्यविषयक सवयी नेमक्या कोणत्या काळापासून सुरू होतात, याचा अभ्यास पोषकता व आहारशास्त्रातील संशोधक करत आहेत. नुकत्याच जर्नल ऑफ दी अॅकेडमी ऑफ न्युट्रीशन अॅण्ड डायटेटिक्समध्ये प्रकाशित झालेल्या संशोधनानुसार शर्करायुक्त आहार खाण्यांमध्ये ६ ते ११ महिने वयाच्या नवजात बालकांचे प्रमाण ६१ टक्के, तर नुकतीच चालू लागलेल्या १२ ते २३ महिने वयांच्या मुलांमध्ये हे प्रमाणे ९८ टक्के इतके आहे. नवजात मुलांमध्ये मुख्यतः विविध स्वादयुक्त गोड दही आणि त्यापेक्षा मोठ्या मुलांसाठी फळांचे रसयुक्त पेये दैनंदिन आहारामध्ये असल्याचे स्पष्ट झाले आहे. हे निष्कर्ष २००५-०६ आणि २०१५-१६ मध्ये केलेल्या अभ्यासातील आहेत. तुलनात्मक विश्लेषणानंतर शर्करायुक्त पेयांचे मुलांमधील हे प्रमाण काहीसे कमी होत असल्याचे दिसून येते. मात्र, इतक्या लहानपणापासून अनारोग्यकारक ठरणाऱ्या खाण्याच्या सवयी तयार होणे, हे धोकादायक ठरू शकते. अमेरिकेतील आरोग्य आणि पोषकता तपासणी सर्वेक्षण विभागातील संशोधिका क्रिस्टेन ए. हेर्रिक यांनी सांगितले, की आमच्या अभ्यासामध्ये नवजात बालक ते नुकतीच चालू लागण्याच्या स्थितीतील बालकांच्या आहारातील शर्करायुक्त पदार्थांचे प्रमाण व एकूण लक्षात आला. हे प्रमाण अनुक्रमे ६१ टक्के आणि ९८ टक्के इतके प्रचंड आहे. हेच आहाराचे पॅटर्न भविष्यामध्ये कायम राहण्याची शक्यता असते. क्रिस्टेन यांनी आधी केलेल्या एका अभ्यासानुसार, जर मुलांनी एक वर्षे वयापूर्वी दोन किंवा दोनपेक्षा जास्त वेळा शर्करायुक्त पेयांचा आस्वाद घेतला असेल, तर ६ वर्षे वयानंतर प्रतिदिन एकदा तरी पेय पिण्याची सवय राहते. दोन वर्षांवरील मुलांच्या आहार शर्करायुक्त असेल, तर त्यांचे दात खराब होणे, अस्थमा, स्थौल्य, रक्तदाब या बरोबरच लिपीड रचनेमध्ये बदल अशा अनेक समस्या तयार होऊ शकतात. निष्कर्ष ः

पालकांनी घ्यावयाची काळजी डॉ. हेर्रिक यांच्या मते, लहान मुलांच्या आहारातील पदार्थांची निवड करताना पालकांची अधिक चोखंदळ राहिले पाहिजे. मातेच्या दुधाकडून अन्य आहाराकडे मुलांना नेत असताना पोषकता, चवीचे प्राधान्य आणि खाण्याच्या सवयी यांचा परिणाम होत असतो. या अत्यंत महत्त्वाच्या टप्प्यावरील आहाराविषयी अधिक अभ्यास होण्याची आवश्यकता आहे. पोषकतेशिवाय केवळ कॅलरीज... सप्टेंबर २०१९ मध्ये अॅकेडमी ऑफ न्युट्रीशन अॅण्ड डायेटिक्स यांनी अमेरिकन हार्ट असोशिएशन, अमेरिकन ॲकेडमी ऑफ पेडियाट्रीक डेन्टिस्ट्री आणि अमेरिकन अॅकेडमी ऑफ पेडियास्टिक्स यांच्या सहकार्याने जाहीर केलेल्या शिफारशीनुसार, पाच वर्षांपर्यंतच्या मुलांच्या एकात्मिक पेय शिफारशींमध्ये मातेचे दूध, शिशुआहार, पाणी आणि नुसते दूध यांचा समावेश केला आहे. त्यांनी लहान मुलांच्या आहारामध्ये साखर घातलेल्या किंवा कमी कॅलरीयुक्त गोडवा आणणाऱ्या कोणत्याही पेयांविषयी काळजी घेण्याची सूचना दिली आहे. उदा. सुगंधी दूध, चॉकलेट, स्ट्रॉबेरी इ. कारण बाजारात उपलब्ध बहुतांश पेयांमध्ये कोणतेही पोषकता मूल्य नसून केवळ कॅलरीज असल्याकडेही त्यांनी लक्ष वेधले आहे.