अॅग्रोवन उत्तर महाराष्ट्राचा स्मार्ट शेतकरी पुरस्कार - श्री. प्रशांत महाजन - तांदलवाडी, जि. जळगाव
प्रशांत महाजन (वय ३७ वर्षे) तांदलवाडी परिसरातील तरुण प्रयोगशील शेतकरी असून, मागील १७ वर्षांपासून आधुनिक पद्धतीने शेती करतात. त्यांच्याकडे विविध पिकांची शेती होत असली तरी केळी या पिकातील महाजन मास्टर समजले जातात. विविध अडचणींमुळे आतबट्ट्याची ठरत असलेल्या केळीच्या पारंपरिक शेतीला नवे वळण देत व आधुनिक तंत्रज्ञानाचा पुरेपूर वापर करत केळी शेतीचे रुपडेच त्यांनी पालटले आहे. आता फिलिपिन्स धर्तीवरील अत्याधुनिक पॅकहाउस उभारून तंत्रज्ञानातील पुढील पाऊल त्यांनी उचलले आहे. परिसरातील शेतकऱ्यांना एकत्र करत समूहशक्तीची मूठ बांधून केळीच्या निर्यातीत उडी घेतली. केळी प्रक्रिया उद्योगासह हळद, कापूस, ऊस, मका, गहू, हरभरा इ. पिकांचे उत्पादन यशस्वीरीत्या घेत आहेत. वयाच्या अवघ्या २० व्या वर्षांपासून ते वडिलोपार्जित एकत्रित कुटुंबाची १५० एकर शेती सांभाळतात. केळीच्या उतिसंवर्धित रोपांची लागवड, ड्रीप ॲटोमेशन, गादीवाफा, आच्छादनाचा वापर, केळी निर्यातीसाठी फ्रूटकेअर तंत्रज्ञानाचा वापर, निर्यातीच्या दृष्टीने स्वतःचे पॅकहाउस आणि प्रीकूलिंग युनिटची उभारणी त्यांनी विभागांतर्गत केलेली आहे. पाटील यांच्या शेतीची वैशिष्ट्ये
फिलिपिन्स धर्तीवरील अत्याधुनिक पॅकहाउस प्रशांत यांनी आपले चुलत बंधू प्रेमानंद यांच्या साह्याने फिलिपिन्स देशातील तंत्रावर आधारित केळीसाठी सुरू केलेले अत्याधुनिक पॅकहाउस चांगलेच उपयोगी ठरू लागले आहे. शेतीमाल निर्यातदार कंपनीला या माध्यमातून ग्रेडिंग, पॅकिंग व पुरवठा अशी सेवा देण्यात येते. सध्या प्रतिदिन ४० टन अशी प्रक्रिया केळीवर होते. सुमारे १६ हजार चौरस फूट जागेत हे पॅकहाउस असून, त्यासाठी दीड कोटी रुपये खर्च आला आहे. महाजन बंधू या निमित्ताने संबंधित कंपनीकडून ठरावीक रक्कम म्हणजे प्रतिक्विंटल सुमारे १०० रुपये दर आकारतात. केळी शेतीतील हे अतिरिक्त उत्पन्न ठरते. अर्थात याचा फायदा तांदलवाडी व परिसरातील शेतकऱ्यांनादेखील होतो. या रकमेचा वाटा त्यांनादेखील देण्यात येतो. निर्यातक्षम केळी असल्याने त्यांच्याही उत्पन्नात चांगली भर पडते. मागील हंगामात क्विंटलला कमाल १४५० रुपये असे दर या निर्यातक्षम केळी उत्पादकांना मिळाले. महाजन यांच्यासह या भागातील शेतकरी देखील ‘फ्रूटकेअर’ तंत्राचा वापर करतात. निर्यातीसाठी किमान सात ते आठ इंच लांबी व ४२ ते४५ कॅलिपर घेर अशी केळीची गुणवत्ता ठेवली जाते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.