ग्रामस्थांच्या पाठबळावर पाण्याचा प्रश्‍न सोडविला : सरपंच सुभाष भोसले

गावाचा विकास साधायचा तर पाणी अत्यावश्यक आहे. आमचे गाव टेकडीवर असल्याने पाण्याची समस्या गंभीर होती. शेती उजाड होती. अनेक जण हमालीचा व्यवसाय करायचे. पण मी ग्रामस्थांच्या पाठबळाने काम केले. पाणी प्रश्न सुटला. गाव हिरवेगार झाले. पुढे आम्ही अनेक विकासकामे साधून अडचणी दूर केल्याचे पिराचेवाडी (ता. कागल, जि. कोल्हापूर) येथील सरपंच सुभाष भोसले यांनी सांगितले. सरपंच महापरिषेत बोलताना श्री. भोसले म्हणाले की गावापासून नदी सात किलोमीटर दूर आहे. पाणी हवे असेल तर नदीवरून जलवाहिनी आणणे गरजेचे होते. या विचारातून ग्रामस्थांना जलवाहिनीचा प्रस्ताव सांगितला. मात्र त्यासाठी पुरेसा निधी नव्हता. मी माझी मालमत्ता, दागिने, जमीन गहाण ठेवली. बारा इंची जलवाहिनी टाकून घेतली. गावात पाणी आल्याने अनेकांनी आपला हमाली व्यवसाय थांबवून शेतीकडे लक्ष दिले. सुमारे २५० एकर क्षेत्र बागायती झाले. गावात उसाची शेती आहे. हळूहळू ग्रामस्थांच्या बळावरच पुढे स्मशानभूमी बांधली. पंचायतीची इमारत बांधण्याच्या वेळेस जुनी इमारत निर्लेखित न करता पाडल्याने मला अपात्र करण्याचा प्रस्ताव सादर झाला. पण आम्ही चांगले काम करीत असल्याने प्रशासनाने हा प्रस्ताव फेटाळला. आता ग्रामपंचायतीची सुंदर इमारत बांधली आहे. गावची स्मशानभूमी चांगली केली आहे. शंभर वर्षे जुनी असलेली शाळा डिजिटल केली. तिथे शिक्षण घेतलेली मुले उच्चशिक्षित झाली. गावातील सुमारे ६५ युवक नोकरी व शिक्षणासाठी पुण्यात राहताहेत. गावातील शंभर एकर क्षेत्रात आता ठिबकची व्यवस्था करायची आहे. यामुळे अधिकाधिक शेती सिंचनाखाली येईल, असेही भोसले यांनी सांगितले. समस्या झेलत विकास साधायला हवा समस्या कायम येतच असतात. पण त्या दूर करून गावाचा विकास करण्याची आपली प्रवृत्ती हवी. आमच्या गावाचा विकास करताना अनेक अडचणींचा सामना केला. अपहार, अनियमितता, असे आरोप आमच्यावर झाले, पण पारदर्शक काम केल्याने कुठलेही आरोप सिद्ध झाले नाहीत, असे राजगड (ता. मूल, जि. चंद्रपूर) येथील चंदू पाटील यांनी या वेळी सांगितले. त्यांनी गावातील विविध उपक्रमांची माहितीही दिली.