मोहरी लागवडीबाबत माहिती द्यावी.

मोहरी लागवडीबाबत माहिती द्यावी.

मोहरी लागवडीसाठी  मध्यम ते भारी, पाण्याचा चांगला निचरा होणारी जमीन निवडावी. जमीन नांगरून, वखरून तयार करावी. बागायती क्षेत्रामध्ये वखराने किंवा सारा यंत्राने सारे पाडावेत. पाणी व्यवस्थापन सुलभ होते. आॅक्टोबरचा शेवटचा आठवडा ते नोव्हेंबरचा पहिला आठवड्यात पेरणी करावी. अति लवकर किंवा उशिरा परेणीमुळे उत्पादनावर परिणाम होतो. तेलाचे प्रमाण घटते. 

लागवडीसाठी पुसा बोल्ड, शताब्दी, जीएम-३, एनआरसीएचबी-१०१ या जातींची निवड करावी. प्रति हेक्टरी ५-६ किलो बियाणे लागते. पेरणीपुर्वी प्रति किलो बियाणास  ३ ग्रॅम थायरमची प्रक्रिया करावी. पेरणीच्या आधी रात्री बियाणे ओलसर पोत्यात ठेवावे, उगवण चांगली होते. कोरडवाहू मोहरीची पेरणी जमिनीत ओल असताना ४५ सें.मी. अंतर ठेवून करावी. पेरणी दाट होऊ नये, यासाठी मोहरीच्या आकाराची वाळू समप्रमाणात मिसळावी. बियाणे ३ ते ४ से.मी. खोल ओलीत पडेल, असे पेरावे. 

बागायती मोहरीच्या पेरणीपूर्वी एक ओलिताची पाळी देऊन वापसा येताच पेरणी करावी. पाणी देण्यासाठी सारे काढावेत.गव्हाबरोबर आंतरपीक म्हणून ९ः१ किंवा ६ः१ ओळीमध्ये पेरणी फायदेशीर ठरते.

निश्चित ओलिताची सोय असल्यास, हेक्टरी ५० किलो नत्र व ४० किलो स्फुरदाची मात्रा द्यावी. त्यातील अर्धे नत्र व पूर्ण स्फुरद पेरणीच्या वेळी व उरलेली अर्धी नत्र मात्रा पेरणीनंतर २५ ते ३० दिवसांनी पहिल्या ओलिताच्या वेळी द्यावी. उत्पादन वाढीसाठी हेक्टरी २० किलो गंधक आणि १ किलो बोराॅन पेरणीच्या वेळीच द्यावे.

संपर्क ः डाॅ. डी. डी. मानकर, ९४२१८१८११२, अखिल भारतीय समन्वयित मोहरी संशोधन प्रकल्प, कृषी महाविद्यालय, नागपूर  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com