सेवानिवृत्तीनंतरही प्रयोगशील शेतीची सेवा

सेवानिवृत्तीनंतरही प्रयोगशील शेतीची अखंड सेवा  काटोल येथील मंडल कृषी अधिकारी दादासाहेब केशवराव काळे २०१६ मध्ये सेवानिवृत्त झाले. पण आरामदायी जीवन पसंत न करता त्यांनी प्रयोगशील शेतीलाच वाहून घेतले आहे. आपले क्षेत्र म्हणजे शेतकऱ्यांसाठी प्रात्यक्षिक प्लॉट ठरावेत असे उद्दिष्ट ठेवून त्यांनी पीक पद्धती व विविध तंत्रज्ञानाचा वापर केला आहे. इंडो इस्त्रायल पद्धतीने संत्र्याची शेती, जोडीला मोसंबी, हंगामी पिके व दुग्ध व्यवसाय अशी विविधता त्यांनी आपल्या शेतीत साकारली आहे.    नागपूर-काटोल हा भाग संत्रा पिकासाठी सर्वदूर प्रसिद्ध आहे. दादासाहेब काळे येथे मंडल कृषी अधिकारी म्हणून कार्यरत होते. कृषी विभागात सुमारे ३३ वर्षे नोकरी केल्यानंतर २०१६ मध्ये ते सेवानिवृत्त झाले. तेलगाव (ता. कळमेश्‍वर, जि. नागपूर) हे त्यांचे मूळ गाव. त्यांचे वडील केशवराव हेदेखील शेतकरीच होते. या संयुक्‍त कुटुंबाची गावात ६० एकर शेती. यामध्ये सिंचनाची सोय तीन किलोमीटरवरील कोलार प्रकल्पावरून केली आहे. कापूस, तूर, हरभरा, गहू यासारखी हंगामी पिके इथे होतातच. पण पाण्याची सोय झाल्यानंतर दहा वर्षांपूर्वी या शिवारात ३० एकरांत संत्रा लागवड करण्यात आली.  प्रयोगशील शेतीचा अंगीकार 

माझ्या शेतात करून दाखवेन  काळे म्हणाले की, नोकरीत असताना अनेक ठिकाणी चर्चासत्रांना जावे लागे. विविध भेटी होत. त्या वेळी लेक्चर देणे सोपे असते. पण शेतात करून दाखवणे अवघड असते असे टोमणे ऐकावे लागत. ही गोष्ट मनाला खूप वेदना द्यायची. अखेर आपल्याच क्षेत्रात सुधारीत शेती करायची. विविध तंत्रांचा वापर करायचा. आपली शेती म्हणजे जणू प्रात्यक्षिक प्लॉटस म्हणून तयार करायचे असा निश्‍चय केला. त्यानुसार पीकपद्धती व शेतीची रचना आखल्याचे काळे म्हणाले.  तंत्रज्ञान सुधारणा 

भागीदारीत दुग्ध व्यवसाय  पूर्वी ५० गावरान गायी व ३० म्हशी काळे कुटुंबीयांकडे होत्या. पंधरा वर्षे या व्यवसायात सातत्य होते. चारा, मजूर टंचाई भेडसावू लागल्याने या व्यवसायातून माघार घ्यावी लागली. मात्र दोन वर्षांपूर्वी काटोल येथील राजू माळोदे यांच्या भागीदारीत पुन्हा व्यवसाय पुन्हा सुरू केला आहे. तीस एचएफ गायींचे संगोपन होते. सुमारे १७५ लिटर दुधाचे संकलन दररोज होते. विक्री काटोल येथील खवा व्यावसायिकाला होते. पाच एकरांत जनावरांसाठी मका लागवड केली आहे. 

संपर्क- दादासाहेब काळे- ९४२२१४९२९८