ख्रिसमस झाडांपासून मिळू शकेल रंग, स्विटनर

नाताळानंतर कचऱ्यामध्ये जाणाऱ्या ख्रिसमस झाडांपासून रंग, गोडी आणणारे पदार्थ असे अनेक औद्योगिक पदार्थ तयार करण्याचे तंत्र इंग्लंड येथील शेफिल्ड विद्यापीठातील संशोधकांनी केला आहे. त्याचा अर्थकारणाबरोबरच पर्यावरणालाही फायदा होणार आहे. सध्या नाताळ व नववर्षाचे वातावरण असून, या काळात ख्रिसमस ट्री अत्यंत महत्त्वाचा मानला जातो. मात्र, नाताळ संपताच अशी अनेक रोपे किंवा छोटी मोठी झाडे कचऱ्यामध्ये जातात. अन्य झाडांच्या तुलनेमध्ये या झाडांची खोडे, सुचिच्या आकाराची पाने कुजण्यासाठी दीर्घकाळ लागतो. या प्रक्रियेमध्ये मोठ्या प्रमाणात हरितगृह वायू उत्सर्जित होतो. हे टाळण्यासाठी अशा हजारो ख्रिसमस झाडांवर प्रक्रिया करून त्यातून उपयुक्त घटक मिळवण्याचे तंत्र शेफिल्ड विद्यापीठातील रसायन आणि जैविक अभियांत्रिकी विभागातील संशोधिका सिंथिया कार्टे यांनी विकसित केले आहे. त्यांनी टाकाऊ ख्रिसमस झाडांपासून रंग आणि अन्नपदार्थांना गोडवा आणणारे घटक तयार केले आहेत. ही प्रक्रिया शाश्वत आणि पर्यावरणपूरक असून, यातून ख्रिसमसनंतरचा कचरा कमी होऊ शकेल.