काळ्या ज्वारीमुळे शासकीय खरेदीला ब्रेक

अमरावती  ः अचलपूर खरेदी विक्री संघाला ज्वारी हमीभाव केंद्र मंजूर करण्यात आले. आत्तापर्यंत ११६ ज्वारी उत्पादकांनी ज्वारी विक्रीसाठी नोंदणीही केली. परंतु, पावसामुळे काळवंडलेली ज्वारी या केंद्रावर घेतली जात नसल्याने त्याबाबत शासनाने वेगळे धोरण जाहीर करावे, अशी मागणी शेतकरी करीत आहेत.  अचलपूर तालुक्‍यात ज्वारी लागवड क्षेत्र असल्याने त्याच्या खरेदीसाठी खरेदी विक्री संघाच्या माध्यमातून हमीभाव केंद्राची मागणी होत होती. जिल्हा प्रशासनाने याची दखल घेत तहसीलदार मदन जाधव यांनी हे केंद्र सुरू करण्यास मान्यता दिली. त्यानंतर ज्वारी उत्पादक ११६ शेतकऱ्यांनी नोंदणी देखील केली. परंतु, मॉन्सूनोत्तर पावसामुळे काळवंडलेल्या ज्वारीच्या विक्रीचा प्रश्‍न निर्माण झाल्याने त्याबाबत निर्णय घेण्यात यावा, अशी मागणी शेतकऱ्यांमधून होत होती. त्यामुळे प्रशासनाने देखील अचलपूर खरेदी विक्री संघाला तूर्तास खरेदी सुरू न करण्यास सांगितले आहे. पावसामुळे बऱ्याच शेतकऱ्यांची ज्वारी काळसर झाली आहे. शासनाने काळ्या ज्वारीबाबत नव्याने आदेश काढावे, अशी शेतकऱ्यांची मागणी आहे. अचलपूर तालुक्‍यात खरिपामध्ये ६ हजार ८६५ हेक्टरवर ज्वारीची पेरणी करण्यात आली आहे. जिल्ह्यात ज्वारीखालील सर्वाधिक क्षेत्र अचलपूर तालुक्‍यातच आहे. त्यामुळे या भागात शासकीय ज्वारी खरेदी केंद्र सुरू करण्यात यावे, अशा आशयाचे पत्र तहसीलदार मदन जाधव यांनी जिल्हा पुरवठा अधिकाऱ्यांना दिले होते. परंतु, या केंद्रावर केवळ एफएक्‍यु दर्जाचा मालच घेण्याचे शासन आदेश आहेत. केंद्रावर शेतकऱ्यांनी काळवंडलेली ज्वारी आणल्यास त्याचा नाहक त्रास त्यांना होईल.