नायजेरियात होणार ‘वाघाड’च्या कार्यपद्धतीचा अवलंब

नायजेरियात होणार ‘वाघाड’च्या कार्यपद्धतीचा अवलंब
नायजेरियात होणार ‘वाघाड’च्या कार्यपद्धतीचा अवलंब

नाशिक  : पाणीवापर संस्थेच्या माध्यमातून जिल्ह्यातील वाघाड प्रकल्पस्तरीय पाणीवापर संघाने जल व्यवस्थापन व जलवितरणाच्या माध्यमातून आदर्श पाणीवापर संस्थांचा समूह म्हणून राष्ट्रीय व आंतरराष्ट्रीय पातळीवर नावलौकिक मिळविला आहे. याच संस्थेच्या माध्यमातून सुरू असलेली कामे व कामकाज समजून घेण्यासाठी नायजेरिया सरकारच्या जलसंपदा मंत्रालयाच्या उच्च पदस्थ शिष्टमंडळाने वाघाड प्रकल्पस्तरीय संस्थेच्या कामकाजासह सर्व पाणी वितरण प्रणालीची पाहणी केली. आगामी काळात नायजेरिया सरकार ‘वाघाड’ प्रकल्पस्तरीय पाणीवापर कार्यपद्धतीचा अवलंब करणार आहे.  नायजेरिया सरकारच्या शिष्टमंडळाने वाघाड प्रकल्प स्तरीय संस्थेस भेट देऊन सहभागी सिंचन व्यवस्थापनातील बारकावे समजून घेतले. नायजेरिया सरकारने सिंचन प्रकल्पांची आखणी केली आहे. यासाठी जागतिक बँकेने अर्थसाह्य घेऊन विकासकामे पूर्ण केली आहेत. हा प्रकल्प लाभार्थ्यांकडे सहभागी सिंचन व्यवस्थापन करुन हस्तांतरित करण्यापूर्वी कामकाजाची कार्यपद्धती समजून घेण्यासाठी नायजेरिया सरकारच्या जलसंपदा मंत्रालयाच्या शेतीसिंचन व्यवस्थापन विभागाचे संचालक इलिजाह आडेरेब्रिज, राष्ट्रीय जलसिंचन प्रकल्पाचे समन्वयक पॅलिस मंज्युक यांच्यासह शिष्टमंडळाने वाघाड प्रकल्पास भेट दिली. महाराष्ट्र शासनाच्यावतीने सह्याद्री फाॕर्म येथे वाघाड प्रकल्पाचे सादरीकरण इंजिनिअर शुभम भालके यांनी केले. या वेळी पाणीवापर संस्था, महाराष्ट्र शासन व समाज परिवर्तन संस्था यांची भूमिका विशद केली. सिंचन व्यवस्थापनातून झालेले कामाचे नियोजन व व्यवस्थापन, कामकाज करण्यासाठी उपलब्ध यंत्रणा व पाण्याचा वाढलेला अधिक कार्यक्षम वापर यामुळे शिष्टमंडाळातील सदस्य प्रभावित झाले. गोवर्धन कुलकर्णी यांनी सादरीकण केले. संस्थेचे माजी अध्यक्ष शहाजी सोमवंशी यांनीही त्यांचे अनुभव सांगितले. शिष्टमंडळाने वाघाड प्रकल्पस्तरीय संस्थेच्या कार्यालयास भेट दिली. या वेळी समाज परिवर्तन केंद्राने इंग्रजीत भाषांतरित केलेला संस्थेचा वार्षिक अहवाल वितरण संस्थेचे सचिव श्री. कदम यांनी केले.  पाणीवापर संस्थेचे सल्लागार माजी अभियंता लक्ष्मीकांत वाघावकर यांनी वाघाड संस्थेच्या यशस्वी व नियोजनबद्ध कामाची तांत्रिक माहिती दिली. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com