शेतमाल तारण योजनेअंतर्गत कारंजा बाजार समितीने केले अडीच कोटींचे वाटप

कारंजालाड, जि. वाशीम  ः शेतकऱ्यांचा शेतमाल बाजारात दाखल होताच शेतमालाचे भाव पडणे हे नित्याचेच झाले आहे. किंबहुना अशा प्रकारचे षड्‌यंत्र व्यापाऱ्यांकडून रचल्या जात असल्याच्या चर्चाही होतात. यावर उपाय म्हणून शासनाच्या पणन विभागाच्या वतीने शेतमाल तारणयोजना सुरू करण्यात आली. या योजनेचा शेतकऱ्यांना लाभ देत येथील बाजार समितीने अडीच कोटींचे वाटप केले आहे. या योजनेनुसार, शेतकऱ्यांना आपला शेतमाल मिळेल त्या भावात न विकता तारण ठेवण्याची सुविधा उपलब्ध करून देण्यात आली आहे. त्यामुळे, ही योजना सद्य:परिस्थितीत शेतकऱ्यांना तारक ठरत आहे. या योजनेअंतर्गत शेतमाल तारण ठेवून बाजार समितीच्या वतीने त्या शेतमालावर शेतकऱ्यांना कर्ज उपलब्ध करून दिले जाते. या अनुषंगाने ही योजना कारंजा बाजार समितीच्या वतीने राबविण्यात येत आहे. या योजनेचा लाभ मिळत असल्याने या योजनेप्रति व बाजार समिती प्रति शेतकऱ्यांत समाधान व्यक्त केल्या जात आहे. यंदा २३ ऑक्टोबरपासून तारण योजनेला कारंजा बाजार समितीत प्रारंभ करण्यात आला.  आजवर कारंजा बाजार समितीने सुमारे १८२ शेतकऱ्यांचे १३ हजार ७८१ क्विंटल सोयाबीन तारण म्हणून ठेवले असून, त्या पोटी शेतकऱ्यांना दोन कोटी ८९ लाख ४० हजार १०० रुपयांचे कर्ज म्हणून वितरण करण्यात आले. या योजनेमुळे मिळालेल्या कर्जाने शेतकऱ्यांच्या रब्बी हंगामासाठी लागणाऱ्या खर्चाची सोय झाली. तर, दैनंदिन आर्थिक समस्याही मिटली. याकरिता, बाजार समितीतील दर लक्षात घेऊन त्या किंमतीच्या ७० टक्के रक्कम शेतकऱ्यांना कर्ज म्हणून दिल्या जाते. यासाठी शेतकऱ्यांना सहा टक्के व्याजदर आकारल्या जातो.  सहा महिन्यांच्या आत बाजार समितीकडे कर्जाच्या रकमेची परतफेड केल्यास संबंधित शेतकऱ्याला वखार महामंडळाच्या गोदाम भाड्याची अर्धी रक्कम समितीमार्फत परत करण्यात येते. तसेच, सदर मालाची शेतकरी स्वतः विक्री करू शकतो. ही योजना शेतकऱ्यांसाठी तारक ठरत असल्याच्या प्रतिक्रिया तालुक्यातील शेतकऱ्यांतून उमटत आहेत.