Chia Cultivation : चियाची वसमत तालुक्यात लागवड

Hingoli News : हिंगोली जिल्ह्यातील वसमत तालुक्यातील शेतकऱ्यांनी यंदाच्या (२०२२-२३ ) रब्बी हंगामात १४ एकरावर चिया लागवड (Chia Cultivation) केली आहे.

वसमत तालुक्यातील अनेक गावातील प्रयोगशील शेतकरी विविध नावीन्यपूर्ण पिकांची लागवड करत आहेत.

सुपर फूड मानल्या जाणाऱ्या चिया पिकांबद्दल माहिती मिळाल्यानंतर रमाकांत भागानगरे आणि अशोक चेपुलवार यांनी मध्य प्रदेशातील निमच येथे जाऊन चिया चे बियाणे (Chia Seed) विकत आणले.

वसमत येथील रमाकांत भागानगरे हे वसंतराव नाईक मराठवाडा कृषी विद्यापीठाचे पदवीधर असून त्यांनी ६ एकर, चंद्रकांत भागानगरे यांनी २ एकर, संजय बाहेती, अशोक चेपुलवार, विनोद झंवर यांनी प्रत्येकी १ एकर, भेंडेगाव (ता. वसमत) येथील बाबूराव भेंडेगावकर यांनी ३ एकर अशी सहा शेतकऱ्यांची मिळून १४ एकरवर चिया ची लागवड केली आहे.

अन्य पिकांच्या तुलनेत उच्च पोषणमूल्य असलेले हे पीक तीन महिने कालावधीचे आहे. या पिकाचा लागवड हंगाम सप्टेंबर ते नोव्हेंबर आहे.

वसमत तालुक्यातील शेतकऱ्यांनी यंदा ता. १५ ते ३० नोव्हेंबर दरम्यान चिया ची लागवड केलेली आहे. दोन ओळीतील अंतर १८ इंच ठेवून चिया बियांची लागवड करण्यात आली आहे.

अन्य पिकांच्या तुलनेत माफक खर्च झाला आहे.आजवर चार पाणी दिले आहेत. सध्या चियाचे पीक फुलोरा तसेच परिपक्वतेच्या अवस्थेत आहे. यंदाच्या उत्पादनानुसार पुढील वर्षीच्या लागवड क्षेत्राचे नियोजन करण्यात येईल.

चिया लागवड करू इच्छिणाऱ्या शेतकऱ्यांसाठी बियाणे उपलब्ध होईल, असे भागानगरे म्हणाले. शुक्रवारी (ता. १७) कृषी विद्यापीठातील अन्न तंत्र महाविद्यालयाचे निवृत्त प्राचार्य पांडुरंग सत्वधर यांनी भागानगरे यांच्या चिया पीकाची पाहणी केली.