Wheat Straw : गव्हाच्या भुश्शाला मोठी मागणी

बापूसाहेब कोकणे

Nagar News : पशुधनाला कोरडा चारा म्हणून देत असलेल्या गव्हाच्या भुशाला परिसरात मागणी वाढली आहे. त्यामुळे कधी काळी शेतातच पेटवून दिल्या जाणाऱ्या भुशाला सोन्याचे दिवस आले आहेत.

त्यामुळे नगरसह अन्य भागांतून शेतकरी शक्य तेवढा भुसा उपलब्ध करून साठा करून ठेवत आहेत. त्यामुळे कधीकाळी वाया जाणारा गव्हाचा भुसा आता मोलाचा ठरत आहे.

नगर जिल्ह्याच्या बहुतांश भागांत दूध व्यवसायाला प्राधान्य दिले जाते. पशू विभागाच्या अधिकाऱ्यांच्या सल्ल्यानुसार जनावरांना हिरव्या चाऱ्यासोबत वाळलेला चारा देणेही गरजेचे आहे. पूर्वी बाजरी, ज्वारीचा कडबा सहज उपलब्ध व्हायचा. आता मात्र ज्वारीचे क्षेत्रच कमी झाले आहे.

त्यामुळे ज्वारीचा कडबा मिळत नाही. दरही गगनाला भिडले आहेत. त्यामुळे गव्हाचा भुसा वाळलेल्या चाऱ्याचा पर्याय शोधला जात आहे. दिवसेंदिवस दुधाच्या भावात होणाऱ्या वाढीमुळे दूध उत्पादक समाधानी दिसत आहेत.

गव्हाचा भुसा पर्याय म्हणून जनावरांना एक उत्तम चारा म्हणून वापरला जातो. त्यामुळे दूध उत्पादक पशुधनाला कडबा (ज्वारीचा चारा) देतात. मात्र तो उपलब्ध होत नसल्यामुळे त्याची जागा गव्हाच्या भुशाने घेतली आहे.

पशुधन मालकांकडून शेतकऱ्यांना भुशाच्या बदल्यात एकरी सोंगणीचा खर्च देऊन गहू तयार करून दिला जात आहे. उसापेक्षा भुशाने (सात ते आठ हजार रुपये टन) भाव खाल्ला आहे. गव्हाबरोबरच इतर पिकांच्या भुशालाही मागणी वाढत आहे.