मुक्ताई पालखीचे आज श्रीक्षेत्र मेहूण येथून प्रस्थान

चांगदेव, जि. जळगाव : आदिशक्ती संत मुक्ताईच्या पालखीचे मंगळवारी (ता. ३१) श्रीक्षेत्र मेहूण तापीतिर येथून प्रस्थान होणार आहे. पंढरपूरात पोचण्यासाठी सर्वात जास्त दिवस लागणारा हा पालखी सोहळा ठरला आहे.

पंढरपूर आषाढी वारीसाठी मुक्ताई पालखीचे प्रस्थान श्रीक्षेत्र मेहूण येथून होते. वर्षानुवर्षे परंपरागत असलेल्या या पालखी सोहळा ३१ मेला दुपारी तीन वाजता संत मुक्ताई मंदिरात आदिशक्ती मुक्ताईच्या पादुका पूजन करून होईल. या पालखीची धुरा हरिभक्त पारायण सुधारक महाराज मेहूणकर वाहत आहे.

यात पहिला मुक्काम चिंचोलनंतर वरणगाव, सुरवाडा, मुंदखेड, जामनेर पुरा, पहूर, चांदईमळा, जालना यासारख्या ३६ दिवसांचा पायी प्रवास करुन ३७ व्या दिवशी ७ जुलैला पंढरपूर येथे मुक्ताई पालखी पोचेल. पंढरपूर येथे वरणगाव येथील चंद्रकांत हरी बढे यांचा खानदेश भक्तनिवास, सांगोला रोड, पंढरपूर येथे आषाढी एकादशीच्या वारीपर्यंत मुक्काम असणार आहे. ज्या भाविकांना मुक्ताई पालखी सोहळ्यात सहभागी व्हायचे असेल त्यांनी श्री आदिशक्ती मुक्ताई देवस्थान श्रीक्षेत्र मेहूण तापीतिर व पालखी चालक हरिभक्त परायण सुधारक महाराज मेहूणकर आणि संस्थानचे अध्यक्ष हरिभक्त पारायण रामराव महाराज मेहूणकर यांच्याशी संपर्क करावा, असे मुक्ताई संस्थान, मेहूण तापीतिरकडून कळविण्यात आले आहे.