Millet Year 2023 : लासोणा येथे शेतकरी जागरूकता कार्यक्रम

Latur Agriculture News : ग्रामीण कृषी मौसम सेवा, वसंतराव नाईक मराठवाडा कृषी विद्यापीठ (VNMKV, Parbhani), परभणी, यांच्यावतीने लासोणा (ता. देवणी) येथे नुकतेच ‘‘आंतरराष्ट्रीय पौष्टिक तृणधान्य वर्ष -२०२३ (Millet Year) निमित्ताने शेतकऱ्यांसाठी कृषी हवामाना सल्ला पत्रिका व पौष्टिक तृणधान्य’’ या विषयावर शेतकरी जनजागृती (Farmer Awareness Programe) कार्यक्रमाचे आयोजन करण्यात आले होते.

कार्यक्रमासाठी प्रमुख पाहूणे म्हणून वसंतराव नाईक मराठवाडा कृषी विद्यापीठ मधील ग्रामीण कृषी मौसम सेवा मुख्य प्रकल्प समन्वयक डॉ. के. के. डाखोरे. कार्यक्रमाचे, अध्यक्ष सरपंच धनराज मठपती, तर यावेळी उपसरपंच अंकुश माने, कृषी सहाय्यक दयानंद कदम, ग्रामसेवक आनंद कुटे, तलाठी कुक्कर गावातील प्रगतशील शेतकरी व्यंकट लादे, मंगेश माने, शंकर माने, संशोधन सहयोगी प्रमोद शिंदे, दत्ता बोबडे, यादव कदम, वरिष्ठ संशोधन फेलो (फसल), कार्यक्रमाचे आयोजक रामकृष्ण माने तसेच गावातील शेतकरी उपस्थित होते.

कार्यक्रमामध्ये मार्गदर्शन करताना डॉ. कैलास डाखोरे यांनी तृणधान्याचे महत्त्व व तृणधान्याच्या उत्पादन वाढीसाठी पंचसूत्री याबद्दल मार्गदर्शन केले. तसेच त्यांनी विद्यापीठाद्वारे प्रसारित केलेल्या विविध वाणांच्या वैशिष्ठयाबद्दल सांगितले.

तसेच हवामान अंदाजाबद्दल माहिती मिळविण्याचे स्रोत तसेच कृषी हवामान सल्ला पत्रिका तयार करण्यासाठी वापरण्यात येणाऱ्या कमी कालावधीच्या, मध्यम कालावधीच्या व दीर्घ कालावधीच्या हवामान अंदाजाबद्दल मार्गदर्शन केले.

त्यांनी कृषी हवामान सल्ला पत्रिका तयार करण्यासाठी तालुका निहाय व जिल्हा निहाय उपग्रहाच्या छायाचित्रांचा उदाहरणार्थ बाष्पोत्सर्जन, जमिनीत ओलावा, एनडीव्हीआय याचा वापर कसा केला जातो याची माहिती दिली.