Minister Nitin Gadkari : संरक्षण सामग्री निर्यात करणारा देश म्हणून भारताची ओळख

Nashik News : पंतप्रधान नरेंद्र मोदी (Prime Minister Narendra Modi) यांच्या नेतृत्वाखाली मेक इन इंडिया व मेड इन इंडियाची सुरवात झाली आहे.

त्यातूनच संरक्षण दलातील विविध साधन सामग्री व संरक्षण साहित्य हे आपल्याच देशात तयार होत असून संरक्षण सामग्री निर्यात करणारा देश म्हणून भारताची ओळख होत आहे, ही आपल्या सर्वांसाठीच अभिमानाची गोष्ट आहे, असे प्रतिपादन केंद्रीय रस्ते वाहतूक व महामार्ग मंत्री नितीन गडकरी (Minister Nitin Gadkari) यांनी केले.

नाशिकमध्ये गोल्फ क्लब मैदानावर आयोजित करण्यात आलेल्या ‘नो युवर आर्मी’ या दोन दिवसीय प्रदर्शनाचे उद्घाटन शनिवार (ता. १८) रोजी केंद्रीय मंत्री गडकरी यांच्या हस्ते संपन्न झाले. त्यावेळी ते बोलत होते.

या कार्यक्रमास केंद्रीय आरोग्य व कुटुंब कल्याण राज्यमंत्री डॉ. भारती पवार, खासदार हेमंत गोडसे, ग्रामविकास मंत्री गिरीश महाजन, पालकमंत्री दादाजी भुसे, आमदार देवयानी फरांदे, सीमा हिरे, स्कूल ऑफ आर्टीलरीचे कमांडन्ट लेफ्टनंट जनरल एस.हरिमोहन अय्यर, तोफखाना केंद्राचे ब्रिगेडियर ए.रागेश, महानगरपालिका आयुक्त डॉ.चंद्रकांत पुलकुंडवार, जिल्हा परिषदेच्या मुख्य कार्यकारी अधिकारी आशिमा मित्तल यांच्यासह आर्टिलरी केंद्राचे प्रमुख अधिकारी उपस्थित होते.

गडकरी म्हणाले, की नव तंत्रज्ञानाच्या आधारे आपल्याच देशात निर्मिती करण्यात येणारे संरक्षण दलातील साधन सामग्री, सैन्यात दिले जाणारे प्रशिक्षण या माध्यमातूनच देशाचे संरक्षण कसे केले जाते. यासर्व गोष्टींची माहिती सर्व सामन्यांना, नव युवकांना होण्यासाठी या ‘नो युवर आर्मी’ प्रदर्शनाचे आयोजन करण्यात आले आहे.

या प्रदर्शनात बोफोर्स तोफ सोबतच भारताने अत्याधुनिक तंत्रज्ञानाच्या मदतीने बनवलेली धनुष्य ही तोफ देखील ठेवण्यात आली आहे. या प्रदर्शनाच्या माध्यमातून विद्यार्थ्यांना व तरुणांना सैन्यात भरती होण्यासाठी नक्कीच प्रेरणा मिळणार आहे.

कार्यक्रमाचे प्रास्ताविक स्कूल ऑफ आर्टीलरीचे कमांडन्ट लेफ्टनंट जनरल एस हरिमोहन अय्यर यांनी केले. तर खासदार हेमंत गोडसे यांनी मनोगत व्यक्त करून सर्वांचे आभार मानले.