Jalgaon Jamod Market Committee : जळगाव जामोद कृषी बाजार समिती सभापतिपदी प्रसेनजित पाटील

Jalgaon Jamod Market Committee Update : स्थानिक कृषी उत्पन्न बाजार समितीच्या सभापतिपदी (ता. १५) राष्ट्रवादीचे प्रदेश सरचिटणीस प्रसेनजित पाटील यांची निवड झाली आहे. तर उपसभापतिपदी शिवसेनेचे माणिकराव वाघ यांची निवड झाली.

सभापतिपदासाठी सोमवारी (ता. १५) झालेल्या निवडणुकीत विरोधी पॅनेलचे रंगराव देशमुख यांचा पाटील यांनी पराभव केला. पाटील यांना ११, तर देशमुख यांना सात मते मिळाली.

त्याचप्रमाणे उपसभापतिपदाच्या निवडणुकीमध्ये शिवसेना तालुकाप्रमुख गजानन वाघ यांचे बंधू माणिकराव वाघ यांना ११ मते मिळाल्याने ते विजयी झाले, तर विरोधी पॅनेलचे उमेदवार भास्कर राऊत यांना सात मते मिळाली.

माणिकराव वाघ हे चौथ्यांदा कृषी उत्पन्न बाजार समितीचे संचालक झाले असून, हमाल प्रतिनिधीला उपसभापती होण्याचा मान हा प्रथमच मिळाला आहे. कृषी उत्पन्न बाजार समिती संचालक मंडळाच्या निवडणुकीत शेतकरी सहकार विकास आघाडी पॅनेलला १८ पैकी ११ जागा मिळाल्या होत्या.

तर पक्षविरहित शेतकरी विकास पॅनेलला सात जागांवर समाधान मानावे लागले होते. आजी, माजी आमदारांचे सहकार्य असलेले पाच पक्षांचे पक्षविरहित शेतकरी विकास पॅनेल एकीकडे, तर प्रसेनजित पाटील यांच्या नेतृत्वात असणारे शेतकरी सहकार विकास आघाडी पॅनेल दुसरीकडे, असा सामना रंगला होता.