Parbhani Market Committee Election : परभणी बाजार समिती निवडणुकीत चुरस

Parbhani News : परभणी कृषी उत्पन्न बाजार समितीच्या (Parbhani Agriculture Produce Market Committee) संचालक मंडळाच्या निवडणुकीत कॉंग्रेस-शिवसेना प्रणीत पॅनेलपुढे भारतीय जनता पक्षाने, शिवसेना स्वाभिमानी शेतकरी संघटना, राष्ट्रवादी काँग्रेस पक्ष, वंचित बहुजन महासंघ यांच्या बाजार समिती बचाव शेतकरी बचाव पॅनेलने तगडे आव्हान उभे केले आहे. त्यामुळे यंदाची निवडणुकीत चुरशीची होण्याची शक्यता आहे.

निवडणूक कार्यक्रम जाहीर झाल्यानंतर अनेक पक्षांनी स्वबळावर निवडणूक लढणार असल्याचे जाहीर केले होते. परंतु सक्षम उमेदवार न मिळाल्यामुळे तसेच जागा वाटपातील मतभेदामुळे कोणत्याही पॅनेलला सर्व १८ जागांवर उमेदवार उभे करता आले नाहीत.

उमेदवारी अर्ज मागे घेण्याच्या अंतिम दिवशी गुरुवारी (ता. २०) अखेरच्याक्षणापर्यंत महाविकास आघाडीतील कॉग्रेस, शिवसेना, राष्ट्रवादी कॉग्रेस यांच्यात जागा वाटपाबाबत एकमत होऊ शकले नाही. परिणामी राष्ट्रवादी कॉग्रेसच्या स्थानिक नेतमंडळीनी भाजपा प्रणीत पॅनेलसोबत जाण्याचा निर्णय घेतला.

उमेदवार असे...

परभणी कृषी उत्पन्न बाजार समिती संचालक मंडळाच्या १८ जागांसाठी विविध मतदारसंघातील मिळून एकूण ६१ उमेदवार निवडणूक रिंगणात आहेत. त्यात सर्वसाधारण मतदारसंघात सर्वसाधारण वर्गवारीतील २० उमेदवार, महिला राखीव मध्ये ७, इतर मागासवर्गीय ३, विमुक्त जाती, भटक्या जाती मध्ये ४ उमेदवार आहेत.

ग्रामपंचायत मतदारसंघात सर्वसाधारण वर्गवारातील ९, अनुसूचित जाती जमाती ६, आर्थिकदृष्ट्या दुर्बल घटक ३, व्यापारी मतदार संघ ३, हमाल व तोलारी मतदारसंघील ६ उमेदवार आहेत.