Chandrapur News : आदिवासी विकास महामंडळाच्या माध्यमातून चिमूर प्रकल्पातील विविध केंद्रावर एक लाख ५ हजार ९९९ धानाची खरेदी (Purchase paddy) करण्यात आली आहे. खरेदी करण्यात आलेल्या या धानाची किंमत (Rice Rate) २१ कोटी ६१ लाख ९५३ रुपये असल्याची माहिती महामंडळाच्या सूत्रांनी दिली.
चंद्रपूर जिल्ह्यात आदिवासी विकास महामंडळाकडून यंदाच्या हंगामात ३६ केंद्रांवर हमीभावाने धान खरेदीचे नियोजन होते. मात्र प्रत्यक्षात ३२ केंद्रांवर धानाची आवक झाली.
यात नवखळा, मोहाडी, मोकासा, सावरगाव, जीवनापूर, बाळापूर, चिंधीचक, गोविंदपूर आणि कोजबी या केंद्रांचा समावेश आहे.
सिंदेवाही तालुक्यातील तांबेगडी, मेंढा, लाडबोरी, मुरमाडी, कळमगाव, गडबोरी, शिवनी, नाचणभट्टी, वरोरा तालुक्यांत चारगाव, भटाळा, वडधा, भद्रावती तालुक्यात चंदनखेडा, चोरा आणि आष्टा या धान खरेदी केंद्राचा समावेश आहे.
या धान खरेदी केंद्रांवर या वर्षी हमीभाव २०४० रुपये आहे. गेल्या दोन वर्षे अगोदरपर्यंत शेतकऱ्यांना सातशे रुपयापर्यंत बोनस देण्यात येत होता. त्यामुळे आदिवासी विकास महामंडळ व पणन महासंघाकडे धान विक्रीसाठी शेतकऱ्यांचा कल वाढला होता.
मात्र गेल्या वर्षीपासून बोनसबाबत संदिग्धता आहे. या वर्षी शासनाने हेक्‍टरी बोनसची घोषणा केली आहे. त्यातून क्विंटलमागे फार तोकडी रक्कम मिळणार असल्याने शेतकऱ्यांमध्ये नाराजी आहे.
त्यातच बोनस संदर्भात स्पष्टता न करता आदेशही काढण्यात आले नाही. परिणामी, शेतकऱ्यांमध्ये आणखीनच गोंधळ वाढला आहे.
हमीभावाने धान विक्रीसाठी शेतकऱ्यांना सुरुवातीला ऑनलाइन नोंदणी करावी लागते. चंद्रपूर जिल्ह्यात आदिवासी विकास महामंडळाकडे ७३७४ शेतकऱ्यांनी नोंदणी केली असल्याची माहिती आहे.
यातील नोंदणी केलेल्या शेतकऱ्यांकडून आतापर्यंत एक लाख ५ हजार ९९ क्विंटल धानाची खरेदी करण्यात आली आहे. या धानाची किंमत २१ कोटी ६१ लाख ९५३ रुपये इतकी आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
