Solapur News : कृषी विभागाअंतर्गत जागतिक बँकेच्या अर्थसहाय्याने बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्पाअंतर्गत सोलापूर जिल्ह्यातील शेतकरी उत्पादक कंपन्यांच्या प्रतिनिधींसाठी राज्यातील कृषी संशोधन केंद्र, शेतकरी उत्पादक कंपन्यांसह काही कृषी विषयक प्रकल्पांमध्ये अभ्यास सहल काढण्यात आली.
नाशिक येथील सह्याद्री फार्मर प्रोड्युसर कंपनी, कृषी विज्ञान केंद्र, बारामती आणि महात्मा फुले कृषी विद्यापीठ, राहुरी येथे हा अभ्यासदौरा झाला. जिल्ह्यातील सहा शेतकरी उत्पादक कंपन्यांचे प्रतिनिधी आणि अन्य शेतकरी या सहलीमध्ये सहभागी झाले होते.
प्रामुख्याने मूल्य साखळीवर आधारित उद्योगांना यामध्ये भेटी देण्यात आल्या. त्यात सोयाबीन, तूर, ज्वारी, केळी, डाळिंब व भाजीपाला इत्यादी पिकांवर प्रक्रिया उद्योग व त्यांचे मार्केटिंग तसेच प्रक्रिया उद्योगासाठी विविध आधुनिक अवजारे, यंत्रे, प्रक्रियेतील आधुनिक तंत्रज्ञान या संदर्भातील योजना याची प्रशिक्षणासह माहिती देण्यात आली.
या वेळी स्मार्ट प्रकल्पाचे नोडल अधिकारी तथा प्रकल्प संचालक ‘आत्मा’ सोलापूरचे मदन मुकणे यांच्या मार्गदर्शनाखाली ‘स्मार्ट’चे सूर्यकांत मोरे, पृथ्वीराज गायकवाड, अजय बागल यांनी ही सहल घडवून आणली.
१७३ प्रकल्पांना मंजुरी
कृषी विभागांतर्गत जागतिक बँकेच्या साह्याने बाळासाहेब ठाकरे कृषी व्यवसाय व ग्रामीण परिवर्तन स्मार्ट प्रकल्पाअंतर्गत सोलापूर जिल्ह्यातील शेतकरी उत्पादक कंपनी आणि शेतकरी गट अशा १७३ शेतकऱ्यांना शेतीमाल आधारित विविध प्रक्रिया प्रकल्प मंजूर झाले आहेत.
प्रामुख्याने या शेतकऱ्यांसाठी ही सहल आयोजिण्यात आली होती, असे सांगण्यात आले.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
