Market Committee Election : युतीचे पॅनेल महाविकास आघाडीला पडले भारी

Chhatrapati Sambhajinagar Election Update : स्थानिक पातळीवर नेतृत्वाचा कस लावणाऱ्या छत्रपती संभाजीनगर जिल्ह्यातील बाजार समिती निवडणुकीत भाजपा- शिवसेना (शिंदे गट) युतीतील पॅनेल महाविकास आघाडीच्या पॅनेलला भारी पडली.

निवडणुकीआधी महाविकास आघाडीची ‘वज्रमूठ’ सभा छत्रपती संभाजीनगर जिल्ह्यात होऊनही महाविकास आघाडीच्या पॅनेलला न मिळालेले यश आघाडीची चिंता वाढविणारे आहे. दुसरीकडे भाजप-शिवसेना युतीत निवडणुकीपूर्वी थोडीबहुत कुरबूर वाटत असली तरी ती निकालांनी झाकोळली व युतीच्या स्थानिक नेतृत्वाचे महत्त्व या निवडणुकीने वाढविले हे स्पष्ट आहे.

जिल्हा मध्यवर्ती बॅंक व जिल्हा दूध संघ भाजपा- शिवसेना युतीच्या ताब्यात होते. आता आधी छत्रपती संभाजीनगर आणि नंतर कन्नड, वैजापूर, लासूर स्टेशन, फुलंब्री, गंगापूर व पैठण या सर्वच बाजार समितीमधील सत्ता भाजपा -शिवसेना युतीने काबीज केली.

या निवडणुकीच्या निमित्ताने पालकमंत्री संदीपान भुमरे, आमदार हरिभाऊ बागडे, आमदार रमेश बोरनारे, आमदार प्रशांत बंब आदींचे नेतृत्व समोर आले. दुसरीकडे छत्रपती संभाजीनगरमध्ये महाविकास आघाडीची वज्रमूठ सभा झाली.

त्या सभेत एकदिलाने स्थानिक स्वराज्य संस्थांच्या निवडणुकांना सामोरे जाण्याचा संकल्प केला गेला. परंतु प्रत्यक्षात आघाडीची ही वज्रमूठ बाजार समिती निवडणुकीत तरी ढिली झाल्याचे पाहायला मिळाले. भाजपकडून समाधानकारक जागा न मिळाल्याने निवडणुकीतून माघार घेतल्यानंतर पालकमंत्री संदीपान भुमरे यांनी पैठण बाजार समितीचा किल्ला एकहाती लढविला.

नुसताच लढविला नाही तर त्यांच्या पॅनेलने विरोधात एकत्र आलेल्या महाविकास आघाडीच्या पॅनेलला धूळ चारली. श्री. भूमरे यांच्या नेतृत्वातील पॅनेलचे सर्व १८ संचालक निवडून आले. छत्रपती संभाजीनगर बाजार समितीची निवडणूक आरोप प्रत्यारोपाच्या फैरींनी चांगलीच गाजली.

माजी आमदार डॉ. कल्याण काळे यांच्या नेतृत्वातील महाविकास आघाडीच्या पॅनेलने भाजप आमदार हरिभाऊ बागडे व शिवसेना शिंदे गट युतीच्या पॅनलसमोर आव्हान उभे केल्याचे वाटत होते. पण ते आव्हान सत्तेत पोहचविण्याइतके तगडे राहिले नाही.

भाजपा शिवसेना युतीच्या पॅनेलने ११ जागा जिंकून केवळ ४ जागा जिंकणाऱ्या महाविकास आघाडीला धोबीपछाड दिली. फुलंब्री बाजार समितीची सत्ता १५ वर्षानंतर मिळविण्यात भाजपा-शिवसेना युतीच्या पॅनेलला यश आले त्यांना १४ तर महाविकास आघाडीच्या पॅनेलला केवळ एका जागेवर विजय मिळविता आला.

लासूर स्टेशन आणि गंगापूर बाजार समितीमध्ये महाविकास आघाडीत बिघाडी झाली. लासूर स्टेशन बाजार समितीमध्ये भाजपाचे आमदार प्रशांत बंब व शिवसेना शिंदे गटाने १८ पैकी १४ जागा जिंकून विजय खेचून आला. येथे ठाकरे गट आणि राष्‌ट्रवादीच्या पॅनेलला दोन जागा मिळाल्या तर कॉंग्रेसच्या पॅनेलला एकही जागा जिंकता आली नाही.

गंगापूर बाजार समितीत भाजप- शिवसेना शिंदे गटाच्या पॅनेलने १२ तर राष्‌ट्रवादीच्या पॅनेलला ५ जागा मिळाल्या. इथे भाजप सेना युतीने सत्ता खेचून आणली.

कन्नड बाजार समितीमध्ये माजी आमदार नितीन पाटील, माजी जिल्हा परिषद सदस्या संजना जाधव यांच्या नेतृत्वातील पॅनेलने आमदार उदयसिंह राजपूत व माजी आमदार हर्षवर्धन जाधव यांना धक्‍का दिला.

वैजापूर बाजार समिती निवडणुकीत भाजपा- शिवसेना युतीच्या पॅनेलने ११ जागांवर विजय मिळविला. एकत्र येऊनही महाविकास आघाडीच्या पॅनेलला केवळ ७ जागा मिळाल्याने त्यांना सत्तेपर्यंत पोहचता आले नाही. आमदार रमेश बोरनारे व भाजपाच्या पॅनेलने आपले वर्चस्व कायम राखले.