युक्रेनला मदतीवरून ‘नाटो’मध्ये दोन गट

कीव्ह : रशिया आणि यूक्रेन (Russia Ukraine War) यांच्यातील युद्ध सुरु होऊन तीन महिने पूर्ण होत आले आहेत. रशियाने युद्ध सुरू केल्यानंतर आतापर्यंत यूक्रेनला मदत करणाऱ्या ‘नाटो’ देशांमध्ये (NATO) मतभेद निर्माण झाले आहेत. फ्रान्स आणि जर्मनी यांच्या नेतृत्त्वातील गटाने यूक्रेनला करण्यात येणाऱ्या मदतीला विरोध केला आहे. तर, अमेरिका यूक्रेनला शस्त्र पुरवठा आणि आर्थिक मदत करण्यावर ठाम आहे. फ्रान्स आणि जर्मनी यांच्या नेतृत्त्वातील गटाला रशिया आणि यूक्रेन यांच्यातील युद्ध आणखी लांबण्याची शक्यता असल्याने खर्च वाढेल आणि आर्थिक नुकसान होण्याची भीती आहे. ‘नाटो’मध्येच दोन गट पडल्याने यूक्रेनचे अध्यक्ष झेलेन्स्की (Zelinsky) यांना मोठा धक्का बसला आहे.

रशिया आणि यूक्रेन यांच्यातील युद्धात रशियाकडून निर्माण होत असलेला दीर्घकालीन धोका आणि युद्धाच्या मैदानात रशियासमोर यूक्रेन कसे उभे राहणार यावरून फ्रान्स आणि जर्मनीच्या नेतृत्वातील गटाने प्रश्न उपस्थित केले आहेत. फ्रान्स आणि जर्मनीच्या नेतृत्त्वातील गट यूक्रेनला लांब पल्याची क्षेपणास्त्र देण्याविरोधात भूमिका घेतली आहे.

अमेरिका, ब्रिटन आणि उत्तर युरोपियन देशांना रशियाचे अध्यक्ष व्लादिमीर पुतीन यांच्या विस्तारवादी धोरणाची सुरुवात यूक्रेनवरील हल्ल्यापासून सुरू झाली आहे, असे वाटत आहे. रशिया यूक्रेनच्या भूमीचा वापर करून पाश्चिमात्य देशांवर हल्ला करण्याचा प्रयत्न करू शकतो, अशी भीतीदेखील ‘नाटो’च्या काही सदस्य देशांना वाटत आहे. अमेरिका यूक्रेनला शस्त्रांचा पुरवठा करण्याच्या बाजूने भूमिका घेत असला तरी फ्रान्स आणि जर्मनीने त्या विरोधात भूमिका घेतली आहे. गेल्या आठवड्यापासून ‘नाटो’मधील सदस्य देशांमध्ये दोन गट पडले आहेत.