Agricultural Drone : परतूर तालुक्यात पिकांवरील फवारणीसाठी ड्रोनचा वापर

Jalna News : तालुक्यात अनेक शेतकऱ्यांनी पिकांवर ड्रोनद्वारे फवारणी (Drone Spraying) करण्याला पसंती दिली आहे.

शेतकरी कमी श्रमात जास्त उत्पन्न घेण्याचा प्रयत्न करत आहेत. यासाठी सध्या शेती व्यवसायात (Agricultural business) अत्याधुनिक यंत्राच्या वापरावर भर दिला जात आहे.

गेल्या काही दिवसांपासून ड्रोन शेतीचा पर्याय समोर येत आहे. अत्याधुनिक शेती पद्धतीने शेतकऱ्यांचे कष्ट कमी होऊन कमी कालावधीत अधिकच उत्पन्न शक्य आहे.

तालुक्यातील अनेक शेतकऱ्यांनी ड्रोनच्या साह्याने शेतात फवारणी केली. त्यामुळे शेतकऱ्याचा वेळ आणि पैसा दोन्हींमध्ये बचत होत आहे. आणि मजूरही लागत नसल्याने शेतकऱ्यांना मोठा दिलासा मिळत आहे.

ड्रोनद्वारे एका एकराची फवारणी करण्यासाठी सात ते आठ मिनिटांचा वेळ लागतो. ड्रोनद्वारे एका दिवसात वीस ते पंचवीस एकराची शेतीची फवारणी होऊ शकते.